मुंबई : सर्वांत मोठं ओटीटी प्लॅटफॉर्म असलेल्या नेटफ्लिक्स इंडियाने आज आपल्या प्रेक्षकांसाठी मनोरंजनाचा खजिनाच खुला केला आहे. मंगळवारी एका कार्यक्रमात नेटफ्लिक्सने येत्या काळात रिलीज होणाऱ्या तब्बल १८ नवीन चित्रपट आणि वेब सीरिजची घोषणा केली आहे. यामध्ये थ्रिलर, कॉमेडी, कोर्टरूम ड्रामा आणि अॅक्शनचा जबरदस्त तडका पाहायला मिळणार आहे. विशेष म्हणजे, बॉलिवूडचे दिग्गज सुपरस्टार्स आता थेट तुमच्या मोबाईल आणि टीव्ही स्क्रीनवर एन्ट्री करण्यासाठी सज्ज झाले आहेत. या संपूर्ण घोषणेमध्ये सर्वात जास्त चर्चा रंगली आहे ती म्हणजे अॅक्शन किंग सनी देओल यांच्या ओटीटी पदार्पणाची. सनी देओल ‘इक्का’ (Ikka) या चित्रपटातून डिजिटल प्लॅटफॉर्मवर डेब्यू करत आहेत. नुकत्याच समोर आलेल्या टीझरमध्ये सनी पाजी पुन्हा एकदा वकिलांच्या गणवेशात दिसत असून, त्यांच्यासमोर ‘बॉर्डर’मधील त्यांचा जोडीदार अक्षय खन्ना उभा आहे. अक्षय या चित्रपटात खलनायकाच्या भूमिकेत दिसणार असून हा एक हाय-व्होल्टेज कोर्टरूम ड्रामा असणार आहे.
नेटफ्लिक्सवर झळकणार १८ सिनेमे आणि सीरिज :
चित्रपट : इक्का, घूसखोर पंडत, गांधारी, कर्तव्य, मेड इन कोरिया, हम हिंदुस्तानी, टोस्टर
वेब सीरिज : लेगेसी, मुसाफिर कॅफे, हॅलो बच्चों, ढिंडोरा २, फॅमिली बिझनेस, सुपर बाबू, चुंबक, #लव्ह
शो/इतर : द ग्रेट इंडियन कपिल शो ५, तक्षकूडु, ये दिल सुन रहा है
