भाईंदर : मिरा-भाईंदर महापालिका शाळांमध्ये शिक्षण घेणाऱ्या विद्यार्थिनींना अधिक प्रोत्साहन देण्यासाठी सायकलींचे वाटप करण्याचा निर्णय प्रशासनाने घेतला आहे. यात ९८३ विद्यार्थिनींना सायकल वाटप केले जाणार असून यासाठी सुमारे ६३ लाख रुपये खर्च केले जाणार आहे.
मिरा-भाईंदर महापालिकेच्या ३६ शाळांमध्ये जवळपास साडेनऊ हजार विद्यार्थी शिक्षण घेत आहेत. हे विद्यार्थी प्रामुख्याने समाजातील गरजू कुटुंबांतील आहेत. त्यामुळे या विद्यार्थ्यांच्या सर्वांगीण विकासाची जबाबदारी महापालिकेवर आहे. पालिका शाळांमध्ये शिक्षण घेणाऱ्या विद्यार्थ्यांमध्ये मुलांची संख्या मुलींच्या तुलनेत अधिक आहे. त्यात मुली प्राथमिक शिक्षणानंतर शाळा सोडण्याचे प्रमाणही वाढत आहे.त्यामुळे शैक्षणिक गुणवत्ता वाढवण्यासोबतच मुलींच्या शिक्षणावर भर देण्याचा निर्णय प्रशासनाने घेतला आहे. जास्तीत जास्त मुली शाळेत येण्यासाठी, त्यांच्या शिक्षणाबाबत सकारात्मकता निर्माण करण्यासाठी आणि त्यांच्या शैक्षणिक प्रगतीस चालना देण्यासाठी महिला व बालकल्याण विभागाने यावर्षी विद्यार्थिनींना सायकलींचे वाटप करण्याचा निर्णय घेतला आहे.
