वृत्तसंस्था : स्टँड-अप कॉमेडियन प्रणित मोरे पुन्हा एकदा चर्चेत आला असून, यावेळी कारण कोणताही नवा वाद नसून त्याच्या पुनरागमनाची घोषणा आहे. ‘३७० बिर्याणी’ वादानंतर काही काळ सार्वजनिक कार्यक्रमांपासून दूर राहिलेल्या प्रणितने आता ‘घायल’ या नव्या स्टँड-अप स्पेशलची घोषणा केली आहे. आपल्या अधिकृत इन्स्टाग्राम अकाउंटवर या शोचे पोस्टर शेअर करत त्याने, “जे घडलं ते मी बदलू शकत नाही, पण त्यामुळे मी कसा माणूस बनतो हे माझ्या हातात आहे. ‘घायल’ ही त्याच प्रवासाची कहाणी आहे. याची सुरुवात मुंबईतून होते,” असे लिहिले. या पोस्टनंतर चाहत्यांसह सोशल मीडियावरील अनेक नेटकऱ्यांनी विविध प्रतिक्रिया दिल्या. काहींनी त्याच्या पुनरागमनाचे स्वागत केले, तर काहींनी त्याच्या नव्या शोची तुलना प्रसिद्ध कॉमेडियन समय रैनाच्या ‘Still Alive’ या कमबॅक शोशी करत टीका केली. “तू समय रैना नाहीस, त्याची नक्कल करू नकोस,” अशा प्रतिक्रिया काही वापरकर्त्यांनी नोंदवल्या. मात्र, अनेकांनी दोन्ही कलाकारांच्या परिस्थिती वेगळ्या असल्याचे सांगत अशा तुलनेला विरोधही केला.
ट्रोलिंगदरम्यान प्रणितच्या चाहत्यांनी त्याला मोठा पाठिंबा दिला. “भाऊ, तुमची खूप आठवण आली,” “किंग पुन्हा मनोरंजनासाठी परतला आहे,” अशा प्रतिक्रिया देत अनेकांनी त्याच्या नव्या स्टँड-अप स्पेशलला शुभेच्छा दिल्या. दरम्यान, जून २०२६ मध्ये गुरुग्राम येथे झालेल्या एका स्टँड-अप शोदरम्यान ‘क्राउडवर्क’ सत्रात एका प्रेक्षकाने डेटदरम्यान ३७० रुपयांच्या बिर्याणीबाबत केलेल्या वादग्रस्त वक्तव्यावर प्रणित हसल्याचा व्हिडिओ सोशल मीडियावर व्हायरल झाला होता. त्यानंतर संमती आणि महिलांच्या सुरक्षेसंदर्भातील मुद्द्यांवर मोठा वाद निर्माण झाला होता. वाढत्या टीकेनंतर प्रणित मोरेने सार्वजनिक माफी मागत त्या क्षणी संबंधित प्रेक्षकाला थांबवायला हवे होते, अशी कबुली दिली होती. या प्रकरणाची राष्ट्रीय महिला आयोगाने दखल घेतली होती आणि संबंधित यंत्रणांकडून गुन्हाही नोंदविण्यात आला होता. आता ‘घायल’ या नव्या स्टँड-अप स्पेशलद्वारे प्रणित मोरे पुन्हा एकदा प्रेक्षकांसमोर येत असून, त्याच्या पुनरागमनाकडे मनोरंजन विश्वासह चाहत्यांचे लक्ष लागले आहे.
