ठाणे : राज्यातील दुकाने, आस्थापनांबरोबरच शाळांचे नामफलक मराठी करणे बंधनकारक असतानाही त्याकडे दुर्लक्ष केले जात असल्याची टिका होऊ लागताच, खडबडून जाग आलेल्या ठाणे महापालिका शिक्षण विभागाने शाळांना नोटीसा बजावल्या होत्या. यानंतर शहरातील ४०१ पैकी २४८ शाळांनी केवळ मराठीत नामफलक बसविल्या आहेत तर, मराठी नामफलक बसविण्यास टाळाटाळ करीत असलेल्या उर्वरित १५३ शाळांना शिक्षण विभागाने पुन्हा नोटीसा बजावण्यास सुरूवात केली आहे. त्यात आठ दिवसात नामफलक मराठीत बसविले नाही तर, शाळा मान्यता रद्दचा प्रस्ताव राज्य शासनाकडे पाठविण्याचा इशारा देण्यात येत आहे.
ठाणे महापालिका क्षेत्रात एकूण ७६९ खाजगी अनुदानित, विनाअनुदानित आणि महापालिका शाळा आहेत. त्यात ठाणे महापालिकेच्या ९५ प्राथमिक, ७ माध्यमिक अशा एकुण १०२ शाळा आहेत. तर २०९ खाजगी अनुदानित आणि ५६० विनाअनुदानित शाळा आहेत. यामध्ये ४०१ इंग्रजी माध्यमांच्या शाळा आहेत. राज्यातील दुकाने, आस्थापनांबरोबरच शाळांचे नामफलक मराठी करणे बंधनकारक आहे. असे असतानाही त्याकडे शाळांकडून दुर्लक्ष होत होते आणि पालिका शिक्षण विभागाकडूनही ठोस कारवाई होताना दिसून येत नव्हती. याविरोधात काँग्रेस पक्षाने काही दिवसांपुर्वी आंदोलन केले होते. त्यात शाळांच्या इमारतींचे बांधकाम परिक्षण करावे आणि मराठीत नामफलक लावावे, अशी मागणी करण्यात आली होती. त्याचबरोबर अनेक राजकीय पक्षांनीही अशीच मागणी यापुर्वीही केली होती. राजकीय पक्षांची मागणी आणि आंदोलनानंतर शिक्षणाधिकारी कमलाकांत म्हेत्रे यांनी शाळा प्रशासनाला पत्र पाठविले होते. त्यात महापालिका शाळा, सर्व माध्यमांच्या अनुदानित, विनाअनुदानित, स्वयंअर्थसहाय्य, प्राथमिक, माध्यमिक व उच्च माध्यमिक अशा सर्व शाळांचे नामफलक मराठी भाषेत करावेत. त्याचबरोबर शाळांमधील सर्व पत्रव्यवहाराची भाषा देखील मराठीच असावी. असे स्पष्ट निर्देश त्यांनी दिले होते. यानंतर ठाणे पालिका क्षेत्रातील ४०१ इंग्रजी शाळांपैकी २४८ शाळांचे नामफलक मराठीत केल्याची माहिती पुढे आली आहे.
