पुणे : सोलापूर जिल्ह्यातील करमाळा परिसरातून पुणे शहरात गांजा विक्रीसाठी आलेल्या चौघांना गुन्हे शाखेने अटक केली. त्यांच्याकडून ७२ किलो गांजा, मोटार असा १९ लाख ९३ हजार रुपयांचा मुद्देमाल जप्त करण्यात आला. केसनंद-वाडेबोल्हाई रस्त्यावर ही कारवाई करण्यात आली. भिवा कालीदास वाघमोडे (वय ३६), विष्णू भागवत वाघमोडे (वय २८), हरी श्रीपती ढवळे (वय ३२), मनोज अनिल सुरवसे (वय २९, चौघे मूळ रा. करमाळा, जि. सोलापूर) अशी अटक करण्यात आलेल्यांची नावे आहेत.
गुन्हे शाखेच्या युनिट सातचे सहायक पोलीस निरीक्षक मदन कांबळे आणि पथक हे पुणे-अहिल्यानगर रस्ता परिसरात गस्त घालत होते. त्या वेळी मोटारीतून चौघे जण गांजा विक्रीसाठी येणार असल्याची माहिती पोलीस कर्मचारी ऋषीकेश ताकवणे यांना मिळाली. केसनंद-वाडेबोल्हाई रस्ता परिसरात पोलिसांनी सापळा लावला. पोलिसांनी मोटार अडवली. मोटारीतील चौघांची चौकशी सुरू केली. मोटारीच्या डिक्कीत एका पोत्यात ५८ किलो गांजा असल्याची माहिती चौकशीत पोलिसांना मिळाली. त्यानंतर पोलिसांनी गांजा ठेवलेले पोते जप्त केले. आरोपींनी पुणे शहरात गांजा विक्रीसाठी आणल्याची माहिती पोलिसांना दिली. आरोपीनी करमाळ्यातील घरात गांजा लपवून ठेवल्याचे सांगितले. त्यानंतर पोलिसांचे पथक करमाळ्याला रवाना झाले. करमाळ्यातील धायखिंडी परिसरातील आरोपींच्या घरातून १४ किलो गांजा जप्त केला. पोलिसांनी या कारवाईत एकूण मिळून ७२ किलो गांजा, मोटार असा मुद्देमाल जप्त केला. आरोपी गांजा कोणाला विक्री करणार होते, यादृष्टीने पोलिसांकडून तपास करण्यात येत आहे. पोलीस आयुक्त अमितेश कुमार, सहआयुक्त रंजनकुमार शर्मा, अतिरिक्त आयुक्त पंकज देशमुख, उपायुक्त निखील पिंगळे यांच्या मार्गदर्शनाखाली युनिट सातचे पोलीस निरीक्षक संतोष सोनवणे, सहायक निरीक्षक मदन कांबळे, सारंग दळे, ऋषीकेश ताकवणे, प्रशांत कापुरे, निलेश साळवे, निर्णय लांडे, विनायक साळवे, नेहा तापकीर, विनायक साळवे, नितीन घाडगे, बाळासाहेब तनपुरे यांनी ही कारवाई केली.
