नवी दिल्ली : सामाजिक कार्यकर्ते सोनम वांगचुक यांनी गुरुवारी मध्यरात्री केंद्रीय शिक्षण मंत्री धर्मेंद्र प्रधान आणि केंद्रीय आरोग्यमंत्री जे. पी. नड्डा यांच्या उपस्थितीत आपले बेमुदत उपोषण मागे घेतले. सरकारने नीट (NEET) परीक्षेतील कथित गैरप्रकारांच्या मुद्द्यावर संसदेत चर्चा करण्याचे आश्वासन दिल्यानंतर वांगचुक यांनी उपोषण स्थगित करण्याचा निर्णय घेतला. मात्र, या निर्णयानंतरही आंदोलन संपलेले नसल्याचे स्पष्ट करत कॉक्रोच जनता पार्टी (CJP)चे प्रमुख कार्यकर्ते अभिजीत दिपके यांनी धर्मेंद्र प्रधान यांच्या राजीनाम्याशिवाय आंदोलन मागे घेतले जाणार नसल्याचा निर्धार व्यक्त केला. जंतरमंतर येथे आंदोलकांशी संवाद साधताना दिपके यांनी गुरुवारी दिवसभर आंदोलनस्थळी अनुपस्थित राहिल्याबद्दल दिलगिरी व्यक्त केली. तब्येत बिघडल्यामुळे रात्रभर सलाईन घ्यावी लागली आणि विविध वैद्यकीय तपासण्या कराव्या लागल्याचे त्यांनी सांगितले. तरीही ही चळवळ स्वतःच्या प्रकृतीपेक्षाही अधिक महत्त्वाची असल्याचे ते म्हणाले. त्यांनी आंदोलनकर्त्यांना मोठ्या संख्येने जंतरमंतर येथे उपस्थित राहण्याचे आवाहन करत, धर्मेंद्र प्रधान यांनी पदाचा राजीनामा देईपर्यंत आंदोलन सुरूच राहील, असे सांगितले.
यावेळी अभिजीत दिपके यांनी कॉक्रोच जनता पार्टीच्या कोअर टीमला अटक होण्याची शक्यता व्यक्त केली. गेल्या ३५ दिवसांपासून आंदोलन पूर्णपणे शांततापूर्ण मार्गाने सुरू असूनही सरकारकडून अटकेची कारवाई होऊ शकते, अशी भीती त्यांनी व्यक्त केली. सरकारने आंदोलनकर्त्यांवर कारवाई करू नये, असा आग्रह धरत त्यांनी शांततापूर्ण आंदोलन हा भारतीय राज्यघटनेने दिलेला अधिकार असल्याचे नमूद केले. तसेच सरकारने यापूर्वी आंदोलनाशी संबंधित दोन मोठ्या चुका केल्याचा आरोप करत, आणखी कठोर कारवाई केल्यास आंदोलन अधिक तीव्र होऊ शकते, असा इशाराही दिला. आंदोलनकर्त्यांना उद्देशून त्यांनी स्पष्ट केले की, जर कोअर टीमला अटक झाली तरी आंदोलन शांततापूर्ण आणि संविधानाच्या चौकटीत राहूनच पुढे सुरू ठेवावे. कोणत्याही प्रकारच्या हिंसक किंवा बेकायदेशीर कृतींना पाठिंबा दिला जाणार नसल्याचे सांगत, हिंसाचार करणारे लोक कॉक्रोच जनता पार्टीचे समर्थक असू शकत नाहीत, असे त्यांनी स्पष्ट केले. देशभरातील नागरिकांनी शांततापूर्ण मार्गाने आंदोलन पुढे नेण्याचे आवाहन करत त्यांनी कायद्याचा आदर राखत लोकशाही पद्धतीने लढा सुरू ठेवण्याची भूमिका पुन्हा अधोरेखित केली.
