मुंबई : पादचाऱ्यांना पदपथांवरून सुरक्षित आणि अडथळामुक्त मार्गक्रमण करता यावे, यासाठी मुंबई महानगरपालिकेने ‘पादचारी प्रथम’ (Pedestrian First) अभियान अधिक प्रभावीपणे राबविण्यास सुरुवात केली आहे. या अभियानांतर्गत दादर पश्चिम येथील स्व. माँसाहेब मीनाताई ठाकरे फुल मंडई आणि सेनापती बापट मार्गालगतच्या पदपथांवरील अतिक्रमणांवर शुक्रवारी (२३ ऑक्टोबर) मोठी कारवाई करण्यात आली. या मोहिमेत पदपथांवर अडथळा निर्माण करणारी १२ अनधिकृत बांधकामे, तात्पुरती ताडपत्रीची शेड, अनधिकृत कट्टे हटविण्यात आले, तसेच ६० अनधिकृत फेरीवाल्यांवर निष्कासनाची कारवाई करण्यात आली. महानगरपालिका आयुक्त अश्विनी भिडे यांच्या मार्गदर्शनाखाली सुरू असलेल्या या अभियानाचा उद्देश पदपथ अतिक्रमणमुक्त करून पादचाऱ्यांसाठी सुरक्षित आणि सुलभ सार्वजनिक जागा उपलब्ध करून देणे हा आहे. ही कारवाई मुंबई महानगरपालिकेच्या ‘जी उत्तर’ विभागामार्फत करण्यात आली.
उपायुक्त (परिमंडळ-२) प्रशांत सपकाळे यांच्या मार्गदर्शनाखाली आणि ‘जी उत्तर’ विभागाचे सहायक आयुक्त योगेश देसाई यांच्या नेतृत्वात ही मोहीम राबविण्यात आली. कारवाईदरम्यान कोणताही अनुचित प्रकार घडू नये यासाठी पुरेसा पोलिस बंदोबस्त तैनात करण्यात आला होता. महानगरपालिकेने नागरिकांना आवाहन केले आहे की, पदपथांवर अनधिकृत बांधकामे, शेड, साहित्य किंवा इतर कोणतेही अडथळे निर्माण करू नयेत. अशा प्रकारचे अतिक्रमण आढळल्यास भविष्यातही कठोर कारवाई केली जाईल, असा इशाराही प्रशासनाने दिला आहे. शहरातील पदपथ पादचाऱ्यांसाठी सुरक्षित, मोकळे आणि वापरण्यायोग्य ठेवण्यासाठी ‘पादचारी प्रथम’ अभियान सातत्याने सुरू राहणार असल्याचे महानगरपालिकेने स्पष्ट केले आहे.
