ठाणे : मार्गशीर्ष पौर्णिमेच्या दत्त जयंतीनिमित्त ठाण्यातील दमानी इस्टेट परिसरातील प्राचीन दत्त मंदिरात भाविकांनी दर्शनासाठी गर्दी केली होती. हे मंदिर ११३ वर्षे प्राचीन असून मंदिरात पूजन, महाआरती, भक्तीसंगीत आणि विविध धार्मिक कार्यक्रम पार पडले.
ठाणे शहरात कौपिनेश्वर मंदिरासह विविध प्राचीन मंदिरे आढळून येतात. या मंदिरांमध्येच १९१२ साली विठ्ठल सायन यांनी उभारलेल्या दत्तमंदिराचा समावेश होतो. हे मंदिर ठाण्यातील दमानी इस्टेट परिसरात असून हे ११३ वर्षे जुने आहे. या मंदिरात मोठ्या प्रमाणावर भाविक येत असतात. दरवर्षी दत्त जयंतीनिमित्त मंदिरात भाविकांची मोठी गर्दी होत असते. यंदाही ही परंपरा कायम असल्याचे दिसून आले. मंदिरात परिसरातील नागरिकांसह विविध भागांतून सकाळपासूनच भाविक दर्शनासाठी दाखल झाले होते. मंदिरात पूजन, महाआरती, भक्तीसंगीत आणि विविध धार्मिक कार्यक्रमांचे मंदिर व्यवस्थापनाच्यावतीने आयोजन करण्यात आले होते. तसेच मंदिर परिसरात दिवे, फुलांची आकर्षक सजावट करण्यात आली होती. मंदिर व्यवस्थापन समिती आणि स्वयंसेवकांनी दर्शनाची सुयोग्य व्यवस्था केली होती.
