नवी मुंबई : मुख्यमंत्री देवेंद्र फडणवीस यांनी ६ जून २०२६ रोजी नवी मुंबई आंतरराष्ट्रीय विमानतळ येथे कार्यरत असलेल्या ‘मिट्टी कॅफे’ला भेट देऊन तेथील दिव्यांग कर्मचाऱ्यांशी संवाद साधला. पूर्णपणे दिव्यांग बांधवांद्वारे संचालित होणारा हा कॅफे रोजगार, स्वावलंबन आणि सामाजिक समावेशकतेचा आदर्श मानला जातो. यावेळी मुख्यमंत्र्यांनी कर्मचाऱ्यांच्या कामाची माहिती घेत त्यांच्या जिद्द, आत्मविश्वास आणि कार्यक्षमतेचे कौतुक केले. दिव्यांगत्वाकडे मर्यादा म्हणून न पाहता, क्षमता आणि संधींच्या दृष्टीने पाहण्याची गरज असल्याचे त्यांनी सांगितले. या उपक्रमामुळे दिव्यांग व्यक्तींना आर्थिकदृष्ट्या सक्षम होण्याची संधी मिळत असून समाजात त्यांना सन्मानाचे स्थान प्राप्त होत असल्याचेही त्यांनी नमूद केले.
भेटीदरम्यान मुख्यमंत्र्यांनी कर्मचाऱ्यांसोबत केक कापून आनंदाचे क्षण साजरे केले आणि त्यांचा उत्साह वाढवला. यावेळी गणेश नाईक आणि अदिती तटकरे यांच्यासह अन्य मान्यवर उपस्थित होते. ‘मिट्टी कॅफे’ ही सामाजिक संस्था दिव्यांग व्यक्तींना व्यावसायिक प्रशिक्षण देऊन आदरातिथ्य, व्यवस्थापन आणि खाद्यसेवा क्षेत्रात रोजगाराच्या संधी उपलब्ध करून देते. कौशल्य विकास, आर्थिक स्वावलंबन आणि समावेशक समाजनिर्मिती हे संस्थेचे प्रमुख उद्दिष्ट आहे. दिव्यांग व्यक्तीही मुख्य प्रवाहातील व्यावसायिक क्षेत्रात यशस्वीपणे काम करू शकतात, हा सकारात्मक संदेश देत ही संस्था देशभरात प्रेरणादायी कार्य करत आहे.
