वृत्तसंस्था : जगातील अग्रगण्य ई-कॉमर्स कंपनी अमेझॉनने पुन्हा एकदा मोठ्या प्रमाणावर कर्मचारी कपात केली आहे. यावेळी मात्र कपातीची पद्धतच सर्वांना हादरवणारी ठरली. हजारो कर्मचाऱ्यांना सकाळीच मोबाईलवर दोन मेसेज आले आणि क्षणात त्यांच्या नोकऱ्या गेल्या.
अहवालांनुसार, १४००० कर्मचाऱ्यांना अचानकपणे नोकरीवरून कमी करण्यात आले. सकाळी पहिल्या मेसेजमध्ये लिहिले होते, “कृपया तुमचा ईमेल तपासा”, आणि दुसऱ्यात मदत डेस्क नंबर दिला होता. कर्मचाऱ्यांनी मेल उघडताच त्यांना “तुमची सेवा तात्काळ समाप्त करण्यात आली आहे” असा संदेश दिसला. तथआपी, काहींचे लॉगिन अॅक्सेस तर ते ऑफिसमध्ये पोहोचण्यापूर्वीच बंद करण्यात आले. या कपातीमुळे रिटेल मॅनेजमेंट टीम्सवर सर्वाधिक परिणाम झाला आहे. कंपनीने स्पष्टीकरण दिलं की, व्यवसायातील कार्यक्षमता वाढवणे आणि नवकल्पनांना गती देणे हा या निर्णयामागचा हेतू आहे. तथापि, सोशल मीडियावर अनेक कर्मचाऱ्यांनी या कृतीला “अमानवीय टाळेबंदी” म्हटलं आहे. तसेच अनेकांना या कपातीचा मानसिक धक्का बसल्याचं सांगण्यात येत आहे. अमेझॉनच्या मानव संसाधन विभागाच्या प्रमुख बेथ गॅलेट्टी यांनी सांगितलं की, हा निर्णय कठीण असला तरी आवश्यक होता. प्रत्येक प्रभावित कर्मचाऱ्याला आम्ही पाठिंबा देऊ. संबंधित कर्मचाऱ्यांना ९० दिवसांचा पूर्ण पगार, फायदे, सेव्हरन्स पॅकेज आणि नवीन नोकरी शोधण्यासाठी मदत दिली जाईल.
