मुंबई : राज्यातील इयत्ता अकरावी केंद्रीय ऑनलाइन प्रवेश प्रक्रिया २०२६-२७ अंतर्गत नियमित दुसऱ्या फेरीचे वेळापत्रक जाहीर करण्यात आले आहे. माध्यमिक व उच्च माध्यमिक शिक्षण संचालनालयाने दिलेल्या माहितीनुसार, विद्यार्थ्यांना ६ जून ते ९ जून २०२६ या कालावधीत नवीन नोंदणी, अर्जातील दुरुस्ती तसेच कनिष्ठ महाविद्यालयांच्या पसंतीक्रमाची नोंदणी करण्याची संधी उपलब्ध करून देण्यात आली आहे. राज्यभरातील अकरावी प्रवेश प्रक्रियेत आतापर्यंत १२ लाख ५१ हजार २५९ विद्यार्थ्यांनी नोंदणी केली असून त्यापैकी ४ लाख ५१ हजार ५२ विद्यार्थ्यांनी प्रवेश निश्चित केला आहे. आता प्रवेश प्रक्रियेची नियमित दुसरी फेरी ६ जूनपासून सुरू होणार आहे. विद्यार्थ्यांना ६ जून रोजी सकाळी ८ वाजल्यापासून ९ जून रोजी सायंकाळी ६ वाजेपर्यंत अर्जाचा भाग-१ दुरुस्त करता येणार असून भाग-२ मध्ये कनिष्ठ महाविद्यालयांचे पसंतीक्रम भरता येणार आहेत. विद्यार्थ्यांना किमान एक आणि कमाल दहा महाविद्यालयांचे पर्याय निवडण्याची सुविधा देण्यात आली आहे. अर्ज लॉक करणे अनिवार्य राहणार आहे.
नियमित दुसऱ्या फेरीतील प्रवेश वाटप प्रक्रिया १० ते १२ जूनदरम्यान पार पडणार असून १३ जून रोजी सकाळी १० वाजता प्रवेश वाटप यादी, कट-ऑफ यादी आणि इतर संबंधित माहिती अधिकृत पोर्टलवर प्रसिद्ध केली जाणार आहे. याबाबतची माहिती विद्यार्थ्यांना एसएमएसद्वारेही पाठविण्यात येईल. प्रवेशासाठी पात्र ठरलेल्या विद्यार्थ्यांना १३ जून रोजी दुपारी १२ वाजल्यापासून १६ जून रोजी सायंकाळी ६ वाजेपर्यंत संबंधित कनिष्ठ महाविद्यालयात कागदपत्रांची पडताळणी करून प्रवेश निश्चित करता येणार आहे. याच कालावधीत महाविद्यालयांकडूनही प्रवेश प्रक्रिया पूर्ण करण्यात येईल. दुसऱ्या फेरीतील सर्व प्रवेश प्रक्रिया पूर्ण झाल्यानंतर १८ जून रोजी पुढील फेरीचे वेळापत्रक जाहीर केले जाणार असून १९ जून रोजी सकाळी ११ वाजता रिक्त जागांची माहिती प्रसिद्ध केली जाईल. विद्यार्थी, पालक आणि कनिष्ठ महाविद्यालयांनी जाहीर वेळापत्रकानुसार सर्व प्रक्रिया वेळेत पूर्ण करण्याचे आवाहन संचालनालयाने केले आहे.
