वृत्तसंस्था : तुम्ही जर अमेरिकेत स्थायिक होण्याचे स्वप्न पाहत असाल तर आता तुम्हाला नोकरी किंवा कुटुंबाच्या आधाराची वाट बघावी लागणार नाही. अमेरिकेचे अध्यक्ष डोनाल्ड ट्रम्प यांनी परदेशी नागरिकांसाठी एक नवीन आणि विशिष्ट ‘गोल्ड कार्ड’ व्हिसा योजना जाहीर केली आहे. जी थेट मोठी आर्थिक देणगी देऊन स्थायी निवास मिळवून देते. अमेरिकेच्या ट्रेझरीमध्ये (Treasury) १ दशलक्ष अमेरिकन डॉलर जमा केल्यास आता तुम्ही अमेरिकेचे स्थायी निवासी बनू शकता. या कार्डसाठीचे ऑनलाईन अर्ज सध्या सुरू झाले आहेत. गोल्ड कार्ड व्हिसा हा अध्यक्ष डोनाल्ड ट्रम्प यांनी जाहीर केलेला व्हिसा-आधारित स्थलांतरण कार्यक्रम आहे. हा व्हिसा गुंतवणूक किंवा आर्थिक योगदान देऊन अमेरिकेत कायदेशीर स्थायी निवास (कायमस्वरूपी ग्रीन कार्डप्रमाणे) मिळवून देतो, जो पारंपारिक रोजगार किंवा कुटुंब-आधारित व्हिसा मार्गांपेक्षा वेगळा आहे. एकदा अर्ज मंजूर झाल्यावर, या कार्ड धारकांना अमेरिकेचे नागरिकत्व (US Citizenship) मिळण्याचा मार्ग उघडतो. जो स्थायी रहिवाशांसाठी असलेल्या सामान्य नैसर्गिकरण प्रक्रियेच्या अधीन असतो.
ग्रीन कार्ड
- कुटुंब, रोजगार, लॉटरी, किंवा व्यवसाय गुंतवणूक आणि अमेरिकेत रोजगार निर्मिती आवश्यक.
- सरकारला मोठी रक्कम थेट द्यावी लागत नाही. गुंतवणूक वास्तविक व्यवसायात करावी लागते.
- लांब प्रक्रिया, अनेक कागदपत्रे, वार्षिक कोटा आणि प्रतिक्षा यामुळे वर्षांनुवर्षे थांबावे लागते.
- कुटुंबे, कुशल व्यावसायिक, विद्यार्थी, निर्वासित आणि दीर्घकालीन व्यावसायिक योजना असलेले गुंतवणूकदार.
गोल्ड कार्ड
- मोठ्या आर्थिक योगदानावर पूर्णपणे आधारित. रोजगार निर्मिती किंवा प्रायोजकत्व आवश्यक नाही.
- एककालीन मोठी देणगी (१ ते २ दशलक्ष डॉलर) थेट ट्रेझरीमध्ये जमा करावी लागते. हा खूप महागडा मार्ग आहे.
- जलद मार्ग (Fast-track) म्हणून जाहिरात. आर्थिक योगदानावर अवलंबून असल्याने प्रक्रिया सोपी आणि वेगवान.
- अत्यंत श्रीमंत व्यक्ती आणि टॉप ग्लोबल प्रतिभा (Top Global Talent) टिकवून ठेवू इच्छिणाऱ्या कंपन्यांसाठी. सामान्य स्थलांतरितांसाठी नाही.
