ठाणे : मुंबईतील नोकरदार प्रवाशांची जीवन वाहिनी म्हणून उपनगरीय रेल्वे गाड्यांकडे पाहिले जाते. परंतु आता या उपनगरीय रेल्वे गाड्यांवर अर्थात लोकलवरील जाहिरातीचा वाद चर्चेचा विषय झाला आहे. मध्य रेल्वेच्या गाडीवर लैंगिकतेसंदर्भात पॉवर कॅप्सूलची जाहिरात प्रसिद्ध झाल्याने प्रवासी संघटनेकडून संताप व्यक्त केला जात आहे.
रेल्वे प्रशासनाने कमरेचे डोक्याला गुंडाळले अशी संतप्त टीका रेल्वे संघटनेकडून केली जात आहे. संघटनेने रेल्वे मंत्री अश्विनी वैष्णव यांना एक इ-मेल पाठवून नाराजी व्यक्त केली आहे. मध्य रेल्वे मार्ग मुंबईकर नोकरदार आणि प्रवाशांसाठी अतिशय महत्त्वाची आहे. लाखो नोकरदार या रेल्वेगाड्यांतून प्रवास करतात. अनेकदा रेल्वेगाड्यांवर अधिकृत जाहिराती चिटकविल्या जातात. त्यातून रेल्वेला उत्पन्न देखील मिळत असते. परंतु एका जाहिरातीवरुन वादंग निर्माण होण्याची शक्यता व्यक्त केली जात आहे. कारण ही जाहिरात पॉवर कॅप्सूलची आहे. याबाबत रेल्वे प्रशासनाकडून संताप व्यक्त केला जात असल्याने आता जाहिरातीमुळे वाद चिघळण्याची शक्यता आहे.
