“तुम्ही लढा, स्वतःचे रक्षण स्वतःच करा!” – इंधन टंचाईवरून डोनाल्ड ट्रम्प यांचा मित्रदेशांना इशारा

वृत्तसंस्था : मध्यपूर्वेतील वाढत्या संघर्षामुळे जगासमोर इंधन टंचाईचे मोठे संकट उभे राहिले आहे. या परिस्थितीवर भाष्य करताना अमेरिकेचे राष्ट्राध्यक्ष डोनाल्ड ट्रम्प यांनी मित्रदेशांवर निशाणा साधला आहे. ज्या देशांना इंधनाची कमतरता भासत आहे, त्यांच्यासमोर आता फक्त दोनच पर्याय उरले आहेत. एक तर अमेरिकेकडून इंधन खरेदी करा किंवा इराणने रोखलेल्या ‘होर्मुझच्या सामुद्रधुनी’त जाऊन स्वतःचा मार्ग मोकळा करा, असे ट्रम्प यांनी स्पष्ट केले आहे. या युद्धात अमेरिकेला साथ न देणाऱ्या मित्रदेशांवर ट्रम्प यांनी जोरदार टीका केली. विशेषतः ब्रिटनसारख्या देशांचा उल्लेख करत त्यांनी सोशल मीडियावर पोस्ट केली की, “ज्या देशांना होर्मुझच्या सामुद्रधुनीमुळे इंधन मिळत नाहीये, त्यांना माझा सल्ला आहे की, पहिल्यांदा अमेरिकेकडून इंधन विकत घ्या, आमच्याकडे भरपूर साठा आहे. दुसरे म्हणजे, थोडे धाडस दाखवा आणि सामुद्रधुनीत जाऊन तुमचे तेल स्वतः मिळवा. आता तुम्हाला स्वतःसाठी लढायला शिकावे लागेल, अमेरिका नेहमीच तुमच्या मदतीला धावून येणार नाही.”