मुंबई : आशियाई चित्रपट महोत्सवाच्या माध्यमातून गेली दोन दशकांहून अधिक काळ मुंबईकरांना आशियाई देशांमधील उत्तमोत्तम चित्रपट पाहण्याची संधी देणाऱ्या २२ व्या थर्ड आय चित्रपट महोत्सवाची घोषणा सोमवारी करण्यात आली. ९ जानेवारी ते १५ जानेवारी २०२६ दरम्यान आयोजित करण्यात आलेल्या थर्ड आय आशियाई चित्रपट महोत्सवात यंदा प्रसिध्द लेखिका-दिग्दर्शिका पद्मभूषण सई परांजपे यांना ‘आशियाई चित्रपट संस्कृती पुरस्कार’ देऊन सन्मानित करण्यात येणार आहे. तर ख्यातनाम लेखिका, कास्टिंग डिरेक्टर उमा दा कुन्हा यांना ‘सत्यजित रे स्मृती पुरस्कार’ देऊन गौरवण्यात येणार आहे.
आशियाई चित्रपटांबरोबरच विविध भारतीय भाषांमधील चित्रपट पाहण्याची संधी देणाऱ्या ‘थर्ड आय’ आशियाई चित्रपट महोत्सवाचे आयोजन ९ जानेवारी ते १५ जानेवारी दरम्यान करण्यात आले आहे. यंदा महोत्सवात एकूण ५६ चित्रपटांची निवड करण्यात आली असून हे चित्रपट प्रभादेवीतील पु.ल. देशपांडे महाराष्ट्र कला अकादमीचे मिनी थिएटर आणि ठाण्यातील लेक शोर मॉलमधील सिनेपोलीस चित्रपटगृहात दाखवले जाणार आहेत, अशी माहिती महोत्सवाचे संचालक संतोष पाठारे यांनी सोमवारी पत्रकार परिषदेत दिली. या महोत्सवाचे उद्धाटन बुसान चित्रपट महोत्सवात फ्रीप्रेस्की परीक्षक पुरस्कार पटकावलेल्या ‘ऑन युवर लॅप’ (पांगकू) या इंडोनेशियन चित्रपटाने होणार आहे. तसेच, महोत्सवातील महत्वाच्या पुरस्कारांबरोबरच दिवंगत चित्रपट अभ्यासक, समीक्षक यांच्या स्मृतीप्रित्यर्थ देण्यात येणारा चित्रपट लेखनाचा विशेष पुरस्कार चित्रपट अभ्यासक मिनाक्षी शेड्डे यांना देण्यात येणार असल्याचेही त्यांनी सांगितले. यावेळी आशियाई चित्रपट फाऊंडेशनचे अध्यक्ष किरण व्ही. शांताराम आणि लेखक, गीतकार, दिग्दर्शक क्षितिज पटवर्धन उपस्थित होते.
