कल्याण : ‘देशाविरोधात कारवाया करणारे दहशतवादी पकडले गेल्यानंतर, हातात लाल धागा बांधून आपण हिंदू असल्याचे भासवत स्वतःची सुटका करून घेतात. चौकशीत ही बाब उघड झाली आहे. दहशतवादी हेडली याने सिद्धिविनायक मंदिराबाहेर विकत मिळणारे लाल धागे या दहशतवाद्यांना नेऊन देत त्यांना बचावाचा एक मार्ग दाखवला होता,’ असा गौप्यस्फोट ज्येष्ठ कायदेतज्ज्ञ उज्ज्वल निकम यांनी केला. डोंबिवली गणेश मंदिर संस्थानच्या वतीने गुढीपाडव्याच्या पूर्वसंध्येला छत्रपती संभाजी महाराज बलिदान दिनानिमित्त आयोजित विविध शारीरिक प्रात्यक्षिकांच्या कार्यक्रमाला निकम उपस्थित होते. यानंतर त्यांच्या मुलाखतीच्या कार्यक्रमाचे आयोजन डोंबिवली पूर्वेकडील आप्पा दातार चौकात करण्यात आले होते. यावेळी त्यांनी हे वक्तव्य केले. त्यांची मुलाखत ज्येष्ठ पत्रकार राजेंद्र हुंजे यांनी घेतली.
कोणत्याही गोष्टीचे यश मिळवण्यासाठी सकारात्मकता महत्त्वाची असल्याचे त्यांनी यावेळी सांगितले. भारताच्या राज्यघटनेचा जगभरात आदर केला जात असून, पाकिस्तानच्या अटर्नी जनरलनेही संविधानाचा गौरव करताना अनेकदा आपणही भारतीय न्यायलयातील ‘केस लॉ’चा आधार घेत असल्याचे मान्य केल्याचे ते म्हणाले. न्यायलयात न्याय मिळतोच, मात्र अथक प्रयत्न करावे लागतात. आपली बाजू मांडण्यासाठी आपल्या आवाजात धार आणि भाषेवर प्रभुत्व असणे गरजेचे असल्याचा सल्ला त्यांनी नव्याने वकिली क्षेत्रात येणाऱ्यांना दिला.
