मुंबई : सोशल मीडियावर मोठ्या प्रमाणात चर्चेत असलेल्या ‘Cockroach Janata Party’ अर्थात CJP संदर्भात नवी घडामोड समोर आली आहे. Instagram वर मोठ्या प्रमाणात फॉलोअर्स मिळवत चर्चेत आलेल्या या व्यंगात्मक मोहिमेचे X (पूर्वीचे Twitter) अकाउंट भारतात ब्लॉक करण्यात आल्याचा दावा करण्यात येत आहे. CJP चे संस्थापक अभिजीत दिपके यांनी सोशल मीडियावर एक स्क्रीनशॉट शेअर करत “अपेक्षेप्रमाणे, कॉकरोच जनता पार्टीचं अकाउंट भारतात ब्लॉक करण्यात आलं आहे,” अशी प्रतिक्रिया दिली. या पोस्टनंतर सोशल मीडियावर विविध चर्चा आणि प्रतिक्रिया उमटू लागल्या आहेत. मात्र, X किंवा संबंधित अधिकृत संस्थांकडून यासंदर्भात कोणतेही अधिकृत स्पष्टीकरण अद्याप समोर आलेले नाही. त्यामुळे या दाव्याबाबत उत्सुकता आणि चर्चेचे वातावरण निर्माण झाले आहे.
काही अहवालांनुसार, CJP ने Instagram वर १० दशलक्षांहून अधिक फॉलोअर्स मिळवत Bharatiya Janata Party च्या अधिकृत अकाउंटलाही फॉलोअर्सच्या बाबतीत मागे टाकल्याची चर्चा सुरू झाली होती. ‘कॉकरोच जनता पार्टी’ ही पारंपरिक राजकीय संघटना नसून व्यंग, मीम्स आणि डिजिटल आंदोलन यांचे मिश्रण असलेली सोशल मीडिया मोहीम मानली जात आहे. बेरोजगारी, पेपरफुटी, राजकीय वातावरण आणि तरुणांमधील नाराजी यांसारख्या मुद्द्यांवर ही मोहीम विशेष चर्चेत आली. स्वतःला “तरुणांची, तरुणांसाठी आणि तरुणांनी उभारलेली चळवळ” असे संबोधणाऱ्या या मोहिमेने अल्पावधीतच मोठा डिजिटल प्रभाव निर्माण केला आहे. Instagram आणि इतर सोशल मीडिया प्लॅटफॉर्मवर या मोहिमेबाबत मीम्स, प्रतिक्रिया आणि चर्चांचा पूर आला असून, आता X अकाउंट ब्लॉक झाल्याच्या दाव्यानंतर या मोहिमेभोवतीचा वाद आणखी वाढण्याची शक्यता व्यक्त केली जात आहे.
