नवी मुंबई : खांदा कॉलनी परिसरात रेल्वे रूळालगतच्या मोकळ्या जागांवर उभारण्यात आलेली अनधिकृत धार्मिक स्थळे आणि राजकीय कार्यालयांवर सिडकोने शनिवारी (२५ एप्रिल) धडक कारवाई करत सर्व बांधकामे हटवली. या कारवाईत सुमारे दीडशे कोटी रुपयांच्या मोक्याच्या भूखंडावरचा ताबा सिडकोने पुन्हा मिळवला असून अतिक्रमण करणाऱ्यांना स्पष्ट इशारा दिला आहे.पनवेल नोडमधील सेक्टर १०, भूखंड क्रमांक २० व ४५ या ठिकाणी सुमारे २००० चौ.मी. क्षेत्रफळाच्या जागेवर अनधिकृत बांधकामे उभारण्यात आली होती.
सुरुवातीला लहान शेड उभारून त्यानंतर धार्मिक कार्यक्रम आयोजित करणे आणि पुढे त्या ठिकाणी स्थायी धार्मिक स्थळे व कार्यालये उभी करणे, असा अतिक्रमणाचा पद्धतशीर प्रकार सुरू होता. खांदेश्वर आणि नवीन पनवेलला जोडणाऱ्या उड्डाणपुलाखालील मोकळी जागा अशाच प्रकारे हळूहळू कब्जात घेतली गेली होती.सिडकोच्या अनधिकृत बांधकाम विभागाच्या पाहणीत हा प्रकार उघडकीस आल्यानंतर संबंधितांना नोटीसा बजावण्यात आल्या होत्या. मात्र, नोटिसांकडे दुर्लक्ष करूनही बांधकामे कायम ठेवण्यात आल्याने अखेर कारवाईचा बडगा उगारण्यात आला. सिडकोचे मुख्य दक्षता अधिकारी सुरेश मेंगडे यांच्या निर्देशानुसार आणि मुख्य बांधकाम नियंत्रक विशाल ढगे यांच्या मार्गदर्शनाखाली नियंत्रक श्रीकांत पावसकर यांच्या नेतृत्वाखाली ही कारवाई करण्यात आली.या कारवाईत सिडकोचे अधिकारी-कर्मचारी, स्थानिक पोलीस, सिडको पोलीस पथक, सुरक्षा रक्षक तसेच महाराष्ट्र सुरक्षा बल यांच्या मदतीने सर्व अनधिकृत बांधकामे जमीनदोस्त करण्यात आली. पुढील अतिक्रमण टाळण्यासाठी संबंधित भूखंडाभोवती तात्काळ कुंपणही घालण्यात आले आहे.सदर बांधकामे सिडकोच्या नियमांचे उल्लंघन करून आणि कोणतीही अधिकृत परवानगी न घेता उभारण्यात आली होती. या कारवाईमुळे परिसरातील मोकळ्या जागांवरील अतिक्रमणाविरोधात सिडकोने कठोर भूमिका घेतल्याचे स्पष्ट झाले असून भविष्यातही अशा कारवाया सुरूच राहणार असा इशारा सिडकोने दिला आहे.
