वृत्तसंस्था : पश्चिम आशियात सुरू असलेल्या युद्धाच्या पार्श्वभूमीवर दुबईहून इस्रायलची राजधानी तेल अवीवकडे निघालेल्या फ्लायदुबईच्या प्रवासी विमानामुळे मोठी खळबळ उडाली. हे विमान सौदी अरेबियाच्या हवाई हद्दीत असताना प्रथम ‘स्क्वॉक कोड 7700’ प्रसारित करण्यात आला, जो आंतरराष्ट्रीय स्तरावर गंभीर आणीबाणीची स्थिती दर्शवतो. त्यानंतर काही वेळातच विमानातून ‘स्क्वॉक कोड 7500’ पाठवण्यात आला. हा कोड सामान्यतः विमान अपहरण किंवा बेकायदेशीर हस्तक्षेपाचा संकेत मानला जात असल्याने सुरक्षा यंत्रणा तात्काळ सतर्क झाल्या. या अलर्टनंतर इस्रायलने लढाऊ विमानांना सज्ज केले, तर विमानाचे सौदी अरेबियातील तबूक विमानतळावर आपत्कालीन लँडिंग करण्यात आले. सुरुवातीला ही घटना विमान अपहरणाची असल्याची भीती व्यक्त करण्यात आली होती.
मात्र, नंतर समोर आलेल्या प्राथमिक माहितीनुसार ही घटना विमान अपहरणाची नसून कॉकपिटमध्ये वैमानिकांमध्ये झालेल्या गंभीर वाद किंवा हाणामारीशी संबंधित असू शकते, अशी माहिती इस्रायली अधिकाऱ्यांनी दिली आहे. या घटनेमुळे विमानाने आपत्कालीन सिग्नल प्रसारित केला होता. विमानातील सर्व प्रवासी सुरक्षित असून, संपूर्ण प्रकरणाचा तपास सुरू आहे. फ्लायदुबईनेही विमानात काही प्रकारची घटना घडल्याची पुष्टी केली असून संबंधित अधिकाऱ्यांना पूर्ण सहकार्य केले जात असल्याचे सांगितले आहे. या घटनेमुळे काही काळ पश्चिम आशियातील हवाई सुरक्षेबाबत मोठी चिंता निर्माण झाली होती.
