वृत्तसंस्था : अमेरिकेत मुलांमध्ये वाढत्या स्मार्टफोन वापराबाबत चिंता व्यक्त होत असताना, Tin Can हे नवे उपकरण झपाट्याने लोकप्रिय होत आहे. Tin Can Technologies यांनी विकसित केलेले हे साधन दिसायला पारंपरिक लँडलाईन फोनसारखे असून, वायरलेस तंत्रज्ञानावर कार्य करते. या उपकरणाद्वारे मुलांना एकमेकांशी मोफत कॉल करता येतात, तसेच आपत्कालीन सेवांशी संपर्क साधता येतो. पालकांच्या परवानगीने इतर क्रमांकावर कॉल करण्यासाठी दरमहा १० डॉलर शुल्क आकारले जाते. एप्रिल २०२५ मध्ये बाजारात आलेल्या या उत्पादनाची मागणी मोठ्या प्रमाणात वाढत असून, कमी जाहिरात असूनही तोंडी प्रचारामुळे त्याची लोकप्रियता वाढल्याचे कंपनीने स्पष्ट केले आहे.
या उपकरणाला शाळांकडूनही सकारात्मक प्रतिसाद मिळत आहे. Nativity Parish School येथे सुमारे ९५ टक्के कुटुंबांनी ‘टिन कॅन’ स्वीकारले आहे. या माध्यमातून विद्यार्थ्यांना दूरध्वनी क्रमांक यादीचा वापर करण्याची सवय लावून पारंपरिक संवाद कौशल्ये पुन्हा विकसित करण्याचा प्रयत्न केला जात आहे. शिक्षक आणि पालकांच्या मते, या उपक्रमामुळे मुलांमध्ये ऐकण्याची क्षमता, आत्मविश्वास आणि संवादकौशल्य वाढण्यास मदत होत आहे. कंपनीचे मुख्य कार्यकारी अधिकारी Chet Kittleson यांनी १९९० च्या दशकातील साध्या आणि थेट संवाद पद्धतीला पुन्हा उजाळा देण्यासाठी हे उपकरण तयार केल्याचे सांगितले.
