नवी मुंबई : रोजच्या स्वयंपाकात तसेच हॉटेल, ज्यूस सेंटर आणि खाद्य व्यवसायांमध्ये मोठ्या प्रमाणात वापरल्या जाणाऱ्या लिंबाच्या दराने पुन्हा एकदा उसळी घेतली आहे. काही दिवसांपूर्वी १० रुपयांना ३ ते ४ लिंबू सहज मिळत होते. मात्र, सध्या लिंबाच्या दरात मोठी वाढ झाली असून, किरकोळ बाजारात १० रुपयांना एकच लिंबू मिळत आहे. त्यामुळे सर्वसामान्य ग्राहकांच्या खिशाला अतिरिक्त भार सहन करावा लागत आहे. वाशी येथील मुंबई कृषी उत्पन्न बाजार समिती (एपीएमसी) मध्ये लिंबाची आवक मोठ्या प्रमाणात घटली आहे. सध्या बाजारात दररोज केवळ २ ते ३ गाड्या लिंबाची आवक होत असून, या माध्यमातून सुमारे १५० क्विंटल लिंबू बाजारात दाखल होत असल्याची माहिती व्यापाऱ्यांनी दिली आहे. आवक कमी झाल्यामुळे घाऊक बाजारातही लिंबाच्या दरात वाढ झाली आहे.
वाशी एपीएमसी बाजारात लिंबाचा पुरवठा प्रामुख्याने आंध्र प्रदेश, महाराष्ट्र, गुजरात आणि मध्य प्रदेशातून केला जातो. मात्र, सध्या प्रमुख उत्पादक भागांमधून येणाऱ्या पुरवठ्यावर परिणाम झाला आहे. त्यामुळे मुंबई बाजारातील लिंबाची आवक कमी झाली असून, त्याचा थेट परिणाम दरांवर झाला असल्याचे व्यापाऱ्यांनी सांगितले. सप्टेंबर महिन्याच्या सुरुवातीला मुंबई एपीएमसीतील लिंबाचा सरासरी घाऊक दर सुमारे ५ हजार रुपये प्रतिक्विंटल होता. त्यानंतर दरात सातत्याने चढ-उतार पाहायला मिळाले. १८ सप्टेंबर रोजी लिंबाचा सरासरी दर वाढून ७ हजार रुपये प्रतिक्विंटल झाला होता. तर २३ सप्टेंबरला हा दर ६ हजार रुपये प्रतिक्विंटल नोंदवण्यात आला. २४ सप्टेंबरला दर पुन्हा ५ हजार रुपये प्रतिक्विंटलवर आला असला तरी महिन्याच्या सुरुवातीच्या तुलनेत बाजारातील दर अजूनही जास्त आहेत. व्यापाऱ्यांच्या माहितीनुसार, यंदा कमी पावसामुळे लिंबाच्या उत्पादनावर परिणाम झाला आहे. उत्पादन घटल्याने बाजारातील आवक कमी झाली असून, दुसरीकडे मागणी कायम असल्याने दर वाढले आहेत. याशिवाय वाहतूक खर्च, मालाची हाताळणी आणि विक्रेत्यांचा वाढलेला खर्च यामुळे किरकोळ बाजारातील लिंबाचे दर आणखी वाढले आहेत. परिणामी, घरगुती ग्राहकांसह हॉटेल आणि खाद्य व्यवसायांनाही या दरवाढीचा फटका बसत आहे.
