पुणे : श्रीमंत दगडूशेठ हलवाई गणपती ट्रस्ट कडून समाजातील वंचित घटकांसाठी राबविल्या जाणाऱ्या उपक्रमांना आणखी बळ देत सारसबागेजवळील हिराबाग कोठी परिसरात मोफत आरोग्य सेवा केंद्र सुरू करण्यात आले आहे. शिक्षण, सामाजिक कार्य आणि आरोग्य या क्षेत्रांत सातत्याने काम करणाऱ्या ट्रस्टने गरजू रुग्णांना दर्जेदार उपचार सहज उपलब्ध व्हावेत या उद्देशाने हा उपक्रम हाती घेतला आहे. या केंद्रात विविध वैद्यकीय तपासण्या, आवश्यक औषधे, श्रवणयंत्रे तसेच कृत्रिम अवयव मोफत देण्यात येणार आहेत. आर्थिक अडचणींमुळे उपचार अपूर्ण राहू नयेत आणि प्रत्येकाला आरोग्य सेवा मिळावी, यासाठी हे केंद्र महत्त्वपूर्ण ठरणार असल्याचे ट्रस्टच्या वतीने सांगण्यात आले.
ट्रस्टचे कोषाध्यक्ष महेश सूर्यवंशी यांनी दिलेल्या माहितीनुसार, या केंद्रामध्ये रक्त तपासण्या, नेत्र तपासणी व मोतीबिंदू शस्त्रक्रिया, जनरल ओपीडी, ईसीजीद्वारे हृदय तपासणी, दंत तपासणी व दात काढण्याची सुविधा उपलब्ध करून देण्यात आली आहे. याशिवाय लहान मुलांसाठी लसीकरण, श्रवण तपासणी तसेच कृत्रिम हात-पाय वाटपासाठी नोंदणी यांसारख्या सेवाही येथे दिल्या जाणार आहेत. सर्व सेवा तज्ज्ञ डॉक्टरांच्या देखरेखीखाली पुरवल्या जाणार असून अधिकाधिक नागरिकांनी या सुविधेचा लाभ घ्यावा, असे आवाहन ट्रस्टने केले आहे. अधिक माहितीसाठी ९८८१५१६५१७ किंवा ९९२३५१६५१७ या हेल्पलाईन क्रमांकांवर संपर्क साधण्याचेही सांगण्यात आले आहे.
