वसई-विरार : वसई विरार महापालिकेकडून शहरातील भटक्या श्वानांच्या व्यवस्थापनासाठी महत्त्वाचा निर्णय घेण्यात आला असून, विविध भागांत ४४ अधिकृत ‘डॉग फीडिंग स्पॉट’ उभारण्याचे नियोजन करण्यात आले आहे. या उपक्रमाचा मुख्य उद्देश म्हणजे सार्वजनिक ठिकाणी होणारा श्वानांचा त्रास कमी करणे आणि श्वानप्रेमी व इतर नागरिकांमध्ये उद्भवणारे वाद टाळणे हा आहे. या ठिकाणी नियोजित पद्धतीने अन्न देण्याची व्यवस्था केली जाईल, ज्यामुळे श्वानांचे अनियंत्रित फिरणे कमी होण्यास मदत होईल. पालिकेकडून प्रथम या संभाव्य ठिकाणांची प्रत्यक्ष पाहणी केली जाणार असून, त्यानंतर अंतिम यादी जाहीर केली जाईल.
जागा निश्चित झाल्यानंतर नागरिकांकडून सूचना व हरकती मागवण्यात येणार असून, ३० एप्रिल २०२६ रोजी सकाळी ११ वाजता महापालिका मुख्यालयात महापौर अजिव पाटील यांच्या उपस्थितीत विशेष बैठक आयोजित करण्यात आली आहे. या बैठकीत प्राणीमित्र संस्था, सोसायटी प्रतिनिधी आणि नागरिकांचा सहभाग घेऊन अंतिम कृती आराखडा निश्चित केला जाईल. याशिवाय, भटक्या श्वानांची संख्या नियंत्रणात ठेवण्यासाठी नसबंदी (ABC) मोहिमेला गती देणे, लसीकरण वाढवणे आणि तक्रारींसाठी स्वतंत्र हेल्पडेस्क सुरू करण्यावरही भर दिला जाणार आहे. तसेच सर्वोच्च न्यायालयाच्या मार्गदर्शक तत्त्वांनुसार शाळा, रुग्णालये आणि रेल्वे स्थानकांसारख्या संवेदनशील ठिकाणांहून श्वानांना हलवून निवारा केंद्रात ठेवण्याचे नियोजन सुरू असले, तरी सध्या योग्य जागेच्या अभावामुळे अंमलबजावणीत अडचणी येत असल्याचे पालिकेकडून स्पष्ट करण्यात आले आहे.
