मुंबई : मुंबई आणि उपनगरांमध्ये नोकरदारांना जेवणाचे डब्बे पोहोचवणारे ‘मुंबईचे डबेवाले’ पुढचे काही दिवस सुट्टीवर असणार आहेत. त्यामुळे नोकरदारांना बाहेरून डब्बा घ्यावा लागणार आहे. दररोज वेळेवर आपल्या टेबलवर येणारा डब्बा आता पुढच्या आठवडाभर नोकरदारांना मिळणार नाही. सरकारी कार्यालय, बँक ऑफिसेस आणि खासगी ऑफिसेसमधील कर्मचाऱ्यांसाठी जेवणाच्या डब्ब्यांची सेवा आता काही दिवसांसाठी बंद राहणार आहे. ‘मुंबईचे डबेवाले’ची सेवा पुढचे सहा दिवस का बंद असेल. नोकरदारांना रोज वेळेवर डब्बा पुरवणाऱ्या ‘मुंबईचे डबेवाले’ यांची ३० मार्च ते ४ एप्रिल या दिवसांत डबे वितरणाची सेवा पूर्णपणे बंद असेल. दरवर्षी प्रमाणे यावर्षी सुद्धा ग्रामदेवतेच्या जत्रेनिमित्त सुट्टी घेत असल्याचं ‘मुंबई डबेवाला असोसिएशन’ने जाहीर केलं आहे. सोमवार ते शनिवार हे सहा दिवस नोकरदारांना जेवणाच्या डब्यांची सेवा मिळणार नाही. त्यामुळे मुंबई आणि उपनगरांमधील लाखो नोकरदारांना पर्यायी जेवणाची व्यवस्था करावी लागणार आहे. दरवर्षीप्रमाणे यावर्षी सुद्धा अनेक मुंबईचे डबेवाले ग्रामदेवतेच्या जत्रेसाठी गावी सहभागी होणार आहेत.
