मुंबई : नोकरदारांसाठी आनंदाची बातमी आहे. पेटीएमनंतर आता उबर ॲपवर सुद्धा मुंबई मेट्रोचं तिकिट उपलब्ध होणार आहे. यापूर्वी मेट्रो लाईन १ चं म्हणजे, घाटकोपर ते वर्सोवा या मार्गावरील तिकिट उपलब्ध झालं होतं. आता त्यानंतर मेट्रो लाईन २A आणि ७ या मेट्रो लाईनचंही तिकीट आता उबर ॲपवर उपलब्ध झाले आहे. उबरने ही सुविधा आता मुंबईतही सुरू केली आहे. यापूर्वी दिल्ली आणि चेन्नईमध्येही अशी सुविधा सुरू झाली होती.
यामुळे मुंबईतील प्रवाशांना आता उबर ॲप न सोडता मेट्रोचे तिकीट खरेदी करता येईल. तिकीट खरेदी करणे सोपे होईल आणि लांब रांगा टाळता येणार आहे. उबर, मुंबई मेट्रो वन आणि ONDC Network यांच्या भागीदारीमुळे हे शक्य झाले आहे. याबद्दलची माहिती मुख्यमंत्री देवेंद्र फडणवीस यांनी एक्स पोस्ट शेअर करत दिली आहे. Yatri, Ixigo, Navi, EMT, Tummoc, Tripozo, One Ticket, Autope, Magicpin, Chalo, RedBus, Highway Delite आणि Pelocal यांसारखे अनेक ॲपच्या माध्यमातून ONDC नेटवर्कच्या माध्यमातून मेट्रो तिकीट सेवा आधीपासूनच उपलब्ध आहे. याशिवाय, मुंबई वन ॲप, मुंबई वन कार्ड आणि व्हॉट्स ॲप आधारित तिकिट खरेदी करून तुम्ही मेट्रो सेवांचा लाभ घेऊ शकतात. ही नवीन सुविधा सुरुवातीला प्रमुख उपनगरीय मार्गांवर धावणाऱ्या मेट्रो लाईन २A आणि ७ वर उपलब्ध होत आहे. त्यानंतर लवकरच २B आणि ९ सोबत इतर मार्गांवरही ही सुविधा विस्तारित केली जाईल. मेट्रो तिकिट, रेल्वे तिकिट आणि कॅब बुकिंग या ॲपच्या माध्यमातून तुम्ही असे वेगवेगळे तिकिट तुम्ही बुक करू शकतात. यामुळे प्रवाशांना एकच ॲपवर सर्व बुकिंग करणं शक्य आहे.
उबर ॲपवरून मेट्रो तिकीट कसे बुक करावे?
१. तुमचे Uber App उघडा.
२. होम स्क्रीनवरील ‘Metro Tickets’ किंवा ‘Services’ या पर्यायावर क्लिक करा.
३. तुमचा प्रवासाचा मार्ग (प्रारंभिक आणि अंतिम स्टेशन) निवडा.
४. प्रवाशांची संख्या निवडा आणि भाडे तपासा.
५. UPI द्वारे पेमेंट पूर्ण करा.
६. मिळालेला QR कोड मेट्रो स्टेशनवर एन्ट्री आणि एक्झिटसाठी वापरा.
