वृत्तसंस्था : कन्नड चित्रपटसृष्टीतील ज्येष्ठ अभिनेते उमेश यांचे वयाच्या ८० व्या वर्षी निधन झाले. ते बऱ्याच काळापासून आजारी होते. यकृताच्या कर्करोगाशी झुंज देत त्यांचे निधन झाले. त्यांच्या निधनाने सिनेविश्वात शोककळा पसरली आहे.
कन्नड चित्रपटसृष्टीतील ज्येष्ठ अभिनेते आणि विनोदी कलाकार एम.एस. उमेश यांचे रविवारी निधन झाले. काही दिवसांपूर्वी ते घरी पडले त्यानंतर त्यांना उपचारासाठी रुग्णालयात दाखल करण्यात आले होते. शस्त्रक्रियेदरम्यान डॉक्टरांना यकृताचा कर्करोग आढळून आला. या आजारावर उपचार सुरू झाले. यकृताच्या कर्करोगाशी लढा दिल्यानंतर रविवारी वयाच्या ८० व्या वर्षी त्यांचे निधन झाले. उमेश यांनी त्यांच्या अभिनय कारकिर्दीत ३५० हून अधिक चित्रपटांमध्ये काम केले होते. त्यांनी मोठ्या पडद्यावर रजनीकांतसह अनेक प्रमुख दक्षिण भारतीय कलाकारांसोबत काम केले होते. कर्नाटकचे माजी मुख्यमंत्री आणि खासदार एचडी कुमारस्वामी यांनी त्यांच्या ट्विटर अकाउंटवर अभिनेत्याच्या निधनाबद्दल शोक व्यक्त केला.
