मुंबई : ज्येष्ठ अभिनेते धर्मेंद्र गेल्या काही दिवसांपासून आजारी असून त्यांना रुग्णालयात दाखल करण्यात आलेलं. त्यानंतर, सोशल मीडियावर अचानक धर्मेंद्र यांच्या मृत्यूच्या खोट्या बातम्या पसरू लागल्या. पण, हेमा मालिनी यांनी त्यानंतर ट्विट शेअर करत लिहिलं की, धर्मेंद्र पूर्णपणे बरे आहेत. अशातच, ब्रीच कँडी रुग्णालयातील एक व्हिडिओ सोशल मीडियावर व्हायरल होत आहे. यामध्ये धर्मेंद्र आयसीयूमध्ये बेडवर दिसत असून त्यांचं संपूर्ण शरीर दिसतंय. ज्या हॉस्पिटल कर्मचाऱ्यांनी गुप्तपणे व्हिडिओ रेकॉर्ड केला आणि तो ऑनलाइन शेअर केला त्यांची ओळख पटली असून धर्मेंद्र आणि त्यांच्या कुटुंबाचा हा व्हिडिओ व्हायरल करणाऱ्या हॉस्पिटल कर्मचाऱ्यांना पोलिसांनी अटक केली आहे.
आज सकाळपासून ब्रीच कँडी रुग्णालयातील एक क्लिप अचानक सोशल मीडियावर व्हायरल झाली. धर्मेंद्र आयसीयूमध्ये होते. त्यांच्याभोवती त्यांचं संपूर्ण कुटुंब होतं. पतीची प्रकृती पाहून प्रकाश कौर ढसाढसा रडताना दिसल्या. सनी देओल त्याच्या आईला शांत करताना दिसला, तर बॉबी देओल त्याच्या वडिलांच्या पायांना मालिश करताना दिसला. या व्हिडिओने धर्मेंद्र यांच्या चाहत्यांना धक्का बसला. ही क्लिप सोशल मीडियावर तुफान व्हायरल झाली, ज्यामुळे चाहते आणि सेलिब्रिटींनाही अश्रू अनावर झाले. काहींनी व्हिडिओ शेअर करणाऱ्या व्यक्तीवर संताप व्यक्त केला. हिंदुस्तान टाईम्सच्या रिपोर्टनुसार, आयसीयूमधून धर्मेंद्र यांचा व्हिडिओ शूटकरणाऱ्या रुग्णालयातील कर्मचाऱ्यांना आता अटक करण्यात आली आहे.
