नवी मुंबई : आर्थिक व सायबर फसवणुकीपासून नागरिकांनी सावध राहावे, यासाठी पनवेल रेल्वे पोलीस ठाण्याच्यावतीने ११ नोव्हें. रोजी भारती विद्यापीठ डेंटल कॉलेज अँड हॉस्पिटल, खारघर येथे विशेष जनजागृती मोहीम राबविण्यात आली. ही मोहीम पोलीस आयुक्त (लोहमार्ग, मुंबई) यांच्या आदेशानुसार आयोजित करण्यात आली होती. सकाळी ११ ते दुपारी १२.१० या वेळेत झालेल्या या कार्यक्रमात विद्यार्थ्यांना आणि शिक्षकांना आर्थिक तसेच सायबर गुन्ह्यांपासून संरक्षणासाठी महत्त्वपूर्ण मार्गदर्शन देण्यात आले.
या मोहिमेदरम्यान विद्यार्थ्यांना खालील महत्त्वाच्या सूचना देण्यात आल्या :
- अल्पावधीत पैसे दुप्पट करण्याच्या खोट्या योजनांपासून सावध राहावे.
- पासपोर्ट, आधार, पॅनकार्ड तात्काळ मिळवून देण्याचे आमिष दाखवणाऱ्यांवर विश्वास ठेवू नये.
- एजंटमार्फत घर-जमीन खरेदी करताना जागरूकता बाळगावी.
- ऑनलाइन खरेदीसाठी फसव्या वेबसाईट्सपासून सावध राहावे.
- अनोळखी लिंक, QR कोड स्कॅन करू नका, OTP किंवा UPI माहिती शेअर करू नका.
- फ्री Wi-Fi वापरताना आणि अज्ञात कॉल/मेसेजवर विश्वास ठेवताना सतर्कता ठेवावी.
- सायबर फसवणूक झाल्यास राष्ट्रीय हेल्पलाइन १९३०, महाराष्ट्र सायबर १९४५ किंवा मुंबई लोहमार्ग हेल्पलाइन १५१२ वर तात्काळ संपर्क साधावा.
- Sextortion किंवा डिजिटल ब्लॅकमेलिंग च्या प्रकरणात त्वरित पोलिसांशी संपर्क साधावा.
या जनजागृती मोहिमेत वरिष्ठ पोलीस निरीक्षक विजय तायडे यांच्या मार्गदर्शनाखाली महिला सहाय्यक पोलीस निरीक्षक पुरी, सहायक पोलीस उप निरीक्षक माने, तसेच सात पोलीस अंमलदार सहभागी झाले होते. कार्यक्रमास सुमारे ७० ते ७५ विद्यार्थी, १० वैद्यकीय शिक्षक आणि वैद्यकीय कर्मचारी उपस्थित होते. या उपक्रमाद्वारे “सायबर सुरक्षितता प्रत्येक प्रवाशाची जबाबदारी” हा संदेश प्रभावीपणे देण्यात आला.
