मुंबई : मृद व जलसंधारण विभागाच्या वतीने जलसंधारण दिनानिमित्त २१ ऑगस्ट रोजी राज्यभर आयोजित करण्यात येणाऱ्या ‘महा वॉकेथॉन – वॉक फॉर वॉटर’ या उपक्रमाच्या लोगोचे अनावरण मुख्यमंत्री देवेंद्र फडणवीस यांच्या हस्ते सह्याद्री अतिथीगृह येथे करण्यात आले. या कार्यक्रमाला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, मृद व जलसंधारण मंत्री संजय राठोड यांच्यासह मंत्रिमंडळातील इतर सदस्य उपस्थित होते. जलसंवर्धनाबाबत जनजागृती निर्माण करणे, पाण्याच्या संवर्धनाचे महत्त्व समाजापर्यंत पोहोचवणे आणि नागरिकांचा सक्रिय सहभाग वाढवणे, हा या राज्यव्यापी उपक्रमाचा मुख्य उद्देश आहे. राज्यातील सर्व स्तरांवर जलसंधारणाचा संदेश प्रभावीपणे पोहोचावा यासाठी विविध जनजागृती कार्यक्रमांचे आयोजन करण्यात येणार आहे.
राज्य शासनाच्या नियोजनानुसार २१ ऑगस्ट रोजी जलसंधारण दिन, १५ ते २१ ऑगस्ट या कालावधीत जलसंधारण सप्ताह आणि १५ ऑगस्ट २०२६ ते २६ जानेवारी २०२७ या कालावधीत विशेष जलसंधारण अभियान राबविण्यात येणार आहे. या अभियानांतर्गत राज्यभर ‘महा वॉकेथॉन – वॉक फॉर वॉटर’, जलसंधारणाची सामूहिक शपथ, युवकांसाठी लघुचित्रफीत स्पर्धा तसेच शाळा आणि महाविद्यालयांमध्ये विविध स्पर्धा व जनजागृतीपर उपक्रम आयोजित केले जाणार आहेत. या माध्यमातून जलस्रोतांचे संवर्धन, पाण्याचा जबाबदारीने वापर आणि जलसाक्षरतेचा संदेश समाजाच्या प्रत्येक घटकापर्यंत पोहोचवण्यावर भर दिला जाणार आहे.
