वृत्तसंस्था : राजकोटच्या निरंजन शाह स्टेडियमवर खेळल्या गेलेल्या दुसऱ्या एकदिवसीय सामन्यात विराट कोहलीने एका मोठ्या विक्रमाला गवसणी घातली आहे. त्याने भारताचा महान खेळाडू सचिन तेंडुलकरला मागे टाकत न्यूझीलंडविरुद्ध वनडेमध्ये सर्वाधिक धावा करणारा भारतीय फलंदाज होण्याचा मान मिळवला. मात्र, या ऐतिहासिक वैयक्तिक कामगिरीनंतरही भारताला हा सामना जिंकता आला नाही आणि मालिकेत १-१ अशी बरोबरी झाली आहे. विराटने या सामन्यात पहिल्याच चेंडूवर चौकार ठोकून सचिन तेंडुलकरचा १७५० धावांचा विक्रम मोडला. विराटची आता न्यूझीलंडविरुद्ध एकूण धावसंख्या १७७३ झाली आहे. भारतीय फलंदाजांमध्ये विराट आता पहिल्या स्थानी असला, तरी जागतिक स्तरावर ऑस्ट्रेलियाचा माजी कर्णधार रिकी पाँटिंग अजूनही अव्वल स्थानी आहे.
न्यूझीलंडविरुद्ध सर्वाधिक धावा (ODI) :
- रिकी पाँटिंग (ऑस्ट्रेलिया) : १९७१ धावा (५१ सामने)
- विराट कोहली (भारत) : १७७३ धावा (३५ सामने)
- सचिन तेंडुलकर (भारत) : १७५० धावा (४२ सामने)
विराटला आता पाँटिंगचा जागतिक विक्रम मोडण्यासाठी आणखी १९८ धावांची गरज आहे.
