मुंबई : भारताच्या सांस्कृतिक वारशासाठी महत्त्वाची आणि दिलासादायक बातमी समोर आली असून अमेरिकेने तब्बल ६५७ प्राचीन वस्तू भारताला परत केल्या आहेत. या दुर्मीळ मूर्ती आणि कलावस्तूंची किंमत सुमारे १२० कोटी रुपये असल्याचे सांगितले जात आहे. या प्रकरणात आंतरराष्ट्रीय तस्कर सुभाष कपूर आणि नॅन्सी वीनर यांच्या नेटवर्कचा सहभाग असल्याचे उघड झाले आहे. न्यूयॉर्कमध्ये आयोजित समारंभात भारताच्या वाणिज्यदूत राजलक्ष्मी कदम यांच्या उपस्थितीत या वस्तू अधिकृतपणे भारताकडे सुपूर्द करण्यात आल्या. मॅनहॅटन जिल्हा अटर्नी कार्यालयाने या कारवाईची माहिती देताना, भारताच्या सांस्कृतिक वारशावर डोळा ठेवणाऱ्या तस्करी जाळ्याचा प्रभाव मोठा असल्याचे नमूद केले.
या ६५७ वस्तू तीन टप्प्यांत भारतात परत करण्यात आल्या. नोव्हेंबर २०२४ मध्ये ६१२ वस्तू, जुलै २०२५ मध्ये २६ वस्तू आणि २८ एप्रिल २०२६ रोजी शेवटच्या टप्प्यात १९ वस्तू भारतात पोहोचल्या. यापैकी १७ वस्तू थेट सुभाष कपूरशी संबंधित असल्याचे स्पष्ट झाले आहे. तरीही सुमारे १००० हून अधिक प्राचीन वस्तू अद्याप परत येणे बाकी असल्याचे तज्ज्ञांचे मत आहे. ‘इंडिया प्राईड’चे सहसंस्थापक एस. विजय कुमार यांनी या यशाचे श्रेय दीर्घकाळ चाललेल्या प्रयत्नांना दिले असून, अमेरिकेच्या तपास यंत्रणांचे विशेष आभार मानले. या कारवाईमुळे भारताच्या सांस्कृतिक वारशाच्या पुनर्स्थापनेला मोठी चालना मिळाली असून, जागतिक स्तरावर कलावस्तू तस्करीविरोधातील लढ्याला अधिक बळ मिळाले आहे.
