ठाणे : ‘स्वच्छता ही सेवा २०२६’ अभियानांतर्गत १ ऑक्टोबर रोजी ठाणे जिल्ह्यात ‘एक दिवस, एक तास, एक साथ’ हा विशेष स्वच्छता उपक्रम मोठ्या प्रमाणावर राबविण्यात येणार आहे. श्रमदानाच्या माध्यमातून स्वच्छतेबाबत जनजागृती करणे, लोकसहभाग वाढविणे आणि स्वच्छ, सुंदर तसेच निरोगी गावांची निर्मिती करणे हा या उपक्रमाचा मुख्य उद्देश आहे. ग्रामपंचायत स्तरावर नागरिक, लोकप्रतिनिधी, अधिकारी-कर्मचारी, स्वयंसेवी संस्था, महिला बचत गट, युवक, विद्यार्थी आणि विविध सामाजिक घटकांच्या सहभागातून सामूहिक श्रमदान आणि स्वच्छता मोहीम आयोजित करण्यात येणार असल्याची माहिती जिल्हा परिषद ठाणे यांनी दिली आहे. गावातील सार्वजनिक परिसर, शाळा, रस्ते, चौक, बाजारपेठा, बसस्थानके, जलस्रोत परिसर तसेच इतर महत्त्वाच्या ठिकाणी स्वच्छता मोहीम राबविण्यात येणार असून, स्थानिक गरजेनुसार प्रत्येक गावात विशेष स्वच्छता उपक्रम हाती घेतले जाणार आहेत. गावातील सार्वजनिक ठिकाणे स्वच्छ ठेवण्यासाठी ग्रामपंचायतींसह नागरिकांनी सातत्याने पुढाकार घ्यावा, असे आवाहन जिल्हा परिषदेचे मुख्य कार्यकारी अधिकारी रणजित यादव यांनी केले आहे.
उपमुख्य कार्यकारी अधिकारी (स्वच्छता व पाणीपुरवठा विभाग) पंडित राठोड यांनी सांगितले की, या उपक्रमाद्वारे ग्रामीण भागात स्वच्छतेची सवय, सार्वजनिक परिसराविषयी जबाबदारी आणि सामूहिक सहभागाची भावना अधिक बळकट करण्याचा प्रयत्न केला जाणार आहे. ‘एक दिवस, एक तास, एक साथ’ या संकल्पनेनुसार प्रत्येक नागरिकाने किमान एक तास स्वच्छतेसाठी श्रमदान केल्यास गावांचा स्वच्छतेकडे पाहण्याचा दृष्टिकोन अधिक सकारात्मक होईल आणि स्वच्छ, सुंदर व निरोगी गावांच्या निर्मितीला गती मिळेल, असा संदेश या अभियानातून दिला जाणार आहे. ग्रामपंचायत स्तरावर स्थानिक नागरिकांचा अधिकाधिक सहभाग सुनिश्चित करण्यावर विशेष भर देण्यात आला असून, स्वच्छता ही सेवा २०२६ अभियान केवळ श्रमदानापुरते मर्यादित न राहता स्वच्छतेबाबत सामूहिक बांधिलकी निर्माण करणारा उपक्रम ठरेल, असा विश्वास प्रशासनाने व्यक्त केला आहे. जिल्ह्यातील सर्व ग्रामपंचायती, नागरिक, लोकप्रतिनिधी, अधिकारी-कर्मचारी, विद्यार्थी, युवक, महिला बचत गट आणि सामाजिक संस्थांनी १ ऑक्टोबर रोजी किमान एक तास स्वच्छतेसाठी श्रमदान करून ‘स्वच्छ, सुंदर आणि निरोगी ठाणे’ घडविण्यासाठी सक्रिय योगदान द्यावे, असे आवाहन जिल्हा परिषद, ठाणे यांच्या वतीने करण्यात आले आहे.
