मुंबई : राज्यात महाराष्ट्र दिन पासून रिक्षा आणि टॅक्सी चालकांसाठी मराठी भाषा अनिवार्य करण्यात येणार आहे. प्रवाशांशी मराठीत संवाद साधणे बंधनकारक राहणार असून, यासाठी परिवहन विभागाने अमराठी चालकांना ‘व्यवहारिक मराठी’ शिकविण्याचा उपक्रम हाती घेतला आहे. या उपक्रमांतर्गत तयार करण्यात आलेल्या संक्षिप्त मार्गदर्शक पुस्तिकेचे प्रकाशन देवेंद्र फडणवीस यांच्या हस्ते करण्यात आले. १ मे ते १५ ऑगस्ट दरम्यान तपासणी मोहीम राबवली जाणार असून, सुरुवातीला तातडीने कारवाई न करता चालकांना मराठी शिकण्यासाठी मुदत दिली जाणार आहे.
ही पुस्तिका विशेषतः रिक्षा, टॅक्सी तसेच Ola आणि Uber सारख्या प्रवासी सेवा देणाऱ्या चालकांसाठी उपयुक्त ठरणार आहे. यामध्ये दैनंदिन व्यवहारातील सोपी व आवश्यक मराठी वाक्ये समाविष्ट करण्यात आली आहेत, ज्यामुळे प्रवाशांशी सुसंवाद साधणे सुलभ होईल. परिवहन मंत्री प्रताप सरनाईक यांनी सांगितले की, या उपक्रमाचा उद्देश सेवा अधिक सुलभ व परिणामकारक करणे आहे. मुख्यमंत्री फडणवीस यांनीही स्थानिक भाषेचे ज्ञान सेवा देताना महत्त्वाचे असल्याचे नमूद केले. या उपक्रमाचे विविध स्तरांतून स्वागत होत असून, पुढील काळात राज्यभर प्रशिक्षण कार्यक्रम राबवले जाणार आहेत. तसेच चालक संघटनांनीही मराठीच्या प्रचार-प्रसारासाठी पुढाकार घ्यावा, असे आवाहन करण्यात आले आहे.
