वृत्तसंस्था : तामिळनाडूमध्ये सोमवारी (२७ ऑक्टोबर २०२५) सायंकाळी एका ईमेलमुळे मोठी खळबळ उडाली. अज्ञात व्यक्तींनी अभिनेते रजनीकांत, अभिनेता धनुष आणि तामिळनाडू काँग्रेस समितीचे अध्यक्ष के. सेल्वपेरुंथगई यांच्या निवासस्थानी बॉम्ब ठेवल्याची धमकी ईमेलद्वारे दिली होती. ही धमकी तामिळनाडूच्या पोलीस महासंचालकांच्या अधिकृत ईमेल आयडीवर पाठवण्यात आली होती.
धमकीचा ईमेल मिळताच सोमवारी सायंकाळी तेयनाम्पेट पोलीस बॉम्ब शोधक रजनीकांत यांच्या पोएस गार्डन येथील निवासस्थानी तातडीने तपासणीसाठी पोहोचले. अभिनेत्याच्या सुरक्षा कर्मचाऱ्यांनी पोलिसांना कोणतीही अनोळखी व्यक्ती घरात बॉम्ब ठेवण्यासाठी आली नसल्याची माहिती दिली, त्यामुळे ही धमकी खोटी असण्याची शक्यता वर्तवण्यात आली.
