नवी मुंबई : नवी मुंबईतील रबाळे एमआयडीसी परिसरात अनैतिक संबंधात अडथळा ठरत असल्याच्या कारणावरून पतीची पत्नीने प्रियकराच्या मदतीने हत्या केल्याचा धक्कादायक प्रकार उघडकीस आला आहे. विशेष म्हणजे हा खून तब्बल ११ महिने लपवून ठेवण्यात आला होता. मात्र, पोलिसांनी केलेल्या तांत्रिक आणि सखोल तपासामुळे या गुन्ह्याचा पर्दाफाश झाला असून, पत्नी सुनीता कुशवा (वय ४०) आणि तिचा प्रियकर राहुल दशरथ प्रजापती (वय ३०) यांना अटक करण्यात आली आहे. याबाबतची माहिती पोलीस उपआयुक्त विजय खरात यांनी दिली. मृत बळीराम सूर्यनाथ कुशवा (वय ५०) हे पत्नी आणि दोन मुलांसह यादव नगर, रबाळे एमआयडीसी परिसरात राहत होते. ऑगस्ट २०२५ पासून बळीराम बेपत्ता असतानाही पत्नीने आठ महिने पोलिसांत हरवल्याची तक्रार दाखल केली नव्हती. चौकशीदरम्यान तिच्या जबाबामध्ये वारंवार विसंगती आढळून आली. तसेच ती वारंवार राहण्याचा पत्ता बदलत असल्याने पोलिसांचा संशय अधिक बळावला. त्यानंतर पोलिसांनी तांत्रिक तपास करत तिच्या मोबाईल कॉल रेकॉर्ड आणि इतर पुरावे तपासले असता राहुल प्रजापती या घणसोली येथे राहणाऱ्या रिक्षाचालकाशी तिचे अनैतिक संबंध असल्याचे समोर आले. तपासादरम्यान आरोपींनी दिलेल्या माहितीनुसार, ८ ऑगस्ट २०२५ रोजी रात्री बळीराम झोपेत असताना दोघांनी मिळून त्याची हत्या केली. त्यानंतर पुरावे नष्ट करण्याच्या उद्देशाने मृतदेहाचे तुकडे करून ते चादरीत गुंडाळून गोणीत भरले आणि निर्जनस्थळी टाकून दिल्याचे तपासात निष्पन्न झाले आहे.
खून केल्यानंतर अनेक महिने हा प्रकार लपविण्यात आला. पत्नी सुनीता ही पती कौटुंबिक वादानंतर घर सोडून गेल्याचे नातेवाईकांना आणि परिसरातील लोकांना सांगत होती. मात्र, बळीरामचा भाऊ मूळ गावाहून नवी मुंबईत आल्यानंतर त्याला या स्पष्टीकरणावर संशय आला. इतर नातेवाईकांनाही बळीरामचा कोणताही संपर्क होत नसल्याने शंका निर्माण झाली. अखेर एप्रिल २०२६ मध्ये कुटुंबीयांनी रबाळे एमआयडीसी पोलीस ठाण्यात बळीराम बेपत्ता असल्याची तक्रार दाखल केली. त्यानंतर पोलिसांनी विविध तांत्रिक पुरावे, मोबाईल रेकॉर्ड आणि आरोपींची चौकशी यांच्या आधारे तपासाची दिशा निश्चित केली. तपासात समोर आलेल्या पुराव्यांच्या आधारे १० जुलै २०२६ रोजी सुनीता कुशवा आणि राहुल प्रजापती यांच्याविरुद्ध हत्या व इतर संबंधित कलमान्वये गुन्हा नोंदवून दोघांना अटक करण्यात आली. त्यानंतर त्यांना न्यायालयात हजर करण्यात आले असता न्यायालयाने १७ जुलैपर्यंत पोलीस कोठडी सुनावली आहे. या प्रकरणाचा पुढील तपास रबाळे एमआयडीसी पोलीस ठाण्याच्या गुन्हे शाखेच्या पोलीस निरीक्षक कल्पना जाधव करत असून, गुन्ह्याशी संबंधित आणखी पुरावे आणि माहिती गोळा करण्याचे काम सुरू असल्याचे पोलीस उपआयुक्त विजय खरात यांनी सांगितले.
