वृत्तसंस्था : मराठी चित्रपटसृष्टीसाठी अभिमानाची बातमी समोर आली आहे. दिग्दर्शक संतोष दावखर यांच्या ‘गोंधळ’ या मराठी चित्रपटाने ऑस्कर २०२७ साठी भारताची अधिकृत प्रवेशिका म्हणून निवड झाल्यानंतर आता आणखी एक महत्त्वाचा टप्पा गाठला आहे. ‘केजीएफ’, ‘कांतारा’ आणि ‘सालार’सारख्या यशस्वी चित्रपटांची निर्मिती करणाऱ्या होम्बळे फिल्म्सने ‘गोंधळ’च्या आंतरराष्ट्रीय वितरणाची जबाबदारी स्वीकारली आहे. त्यामुळे हा चित्रपट जगातील विविध देशांतील चित्रपटगृहांमध्ये प्रदर्शित होणार असून, मराठी चित्रपटाला जागतिक प्रेक्षकांपर्यंत पोहोचण्याची मोठी संधी मिळणार आहे. ग्रामीण महाराष्ट्रातील लोकपरंपरा, सांस्कृतिक वातावरण आणि रहस्यमय कथानकावर आधारित ‘गोंधळ’ हा थ्रिलर चित्रपट असून, त्याचे लेखन आणि दिग्दर्शन संतोष दावखर यांनी केले आहे. या चित्रपटात किशोर कदम, इशिता देशमुख, योगेश सोहोनी आणि निषाद भोईर यांनी प्रमुख भूमिका साकारल्या आहेत, तर ज्येष्ठ संगीतकार इलैयाराजा यांनी चित्रपटाला संगीत दिले आहे. ग्रामीण महाराष्ट्रात रात्री पार पडणाऱ्या पारंपरिक गोंधळ विधीच्या पार्श्वभूमीवर उलगडणाऱ्या या कथेत श्रद्धा, मानवी महत्त्वाकांक्षा, सत्ता, अंधविश्वास आणि विश्वासघात यांसारख्या विविध भावविश्वांची प्रभावी मांडणी करण्यात आली आहे. अस्सल मराठी सांस्कृतिक पार्श्वभूमी आणि वेधक कथानकामुळे या चित्रपटाने प्रेक्षकांसह समीक्षकांचेही लक्ष वेधून घेतले आहे.
‘गोंधळ’च्या यशाचा आणखी एक महत्त्वाचा टप्पा म्हणजे ऑस्कर २०२७ मधील ‘सर्वोत्कृष्ट आंतरराष्ट्रीय फीचर फिल्म’ या विभागासाठी भारताची अधिकृत प्रवेशिका म्हणून झालेली निवड. यापूर्वी या चित्रपटाला ५६व्या भारतीय आंतरराष्ट्रीय चित्रपट महोत्सवात (IFFI) सर्वोत्कृष्ट दिग्दर्शकाचा पुरस्कारही मिळाला आहे. या यशामुळे ‘गोंधळ’ची चर्चा केवळ मराठी चित्रपटसृष्टीपुरती मर्यादित न राहता राष्ट्रीय आणि आंतरराष्ट्रीय स्तरावर पोहोचली आहे. दरम्यान, होम्बळे फिल्म्सने आपल्या अधिकृत सोशल मीडिया खात्यावर चित्रपटाचे पोस्टर प्रसिद्ध करत ‘गोंधळ’च्या जागतिक वितरणाची घोषणा केली. पुरस्कारप्राप्त मराठी चित्रपटापासून ऑस्करसाठी भारताची अधिकृत प्रवेशिका होण्यापर्यंतचा ‘गोंधळ’चा प्रवास अभिमानास्पद असल्याचे नमूद करत, ही प्रभावी कथा जगभरातील प्रेक्षकांपर्यंत पोहोचवण्याचा आनंद असल्याचे कंपनीने म्हटले आहे. ‘केजीएफ’ फ्रँचायझी, ‘कांतारा’, ‘सालार’ फ्रँचायझी आणि ‘महावतार नरसिंह’सारख्या चित्रपटांमुळे भारतीय चित्रपटसृष्टीत वेगळी ओळख निर्माण करणाऱ्या होम्बळे फिल्म्सच्या माध्यमातून ‘गोंधळ’ला आंतरराष्ट्रीय बाजारपेठेत मोठे व्यासपीठ मिळणार आहे. मराठी भाषा, लोकपरंपरा आणि ग्रामीण संस्कृतीचे दर्शन घडवणारा हा चित्रपट आता जागतिक प्रेक्षकांसमोर पोहोचणार असल्याने मराठी चित्रपटसृष्टीसाठी ही मोठी उपलब्धी मानली जात आहे. चित्रपटाच्या परदेशातील प्रदर्शनाच्या तारखा आणि कोणत्या देशांमध्ये तो प्रदर्शित होणार, याबाबतची अधिकृत माहिती अद्याप जाहीर झालेली नसली तरी ‘गोंधळ’च्या या जागतिक प्रवासामुळे मराठी चित्रपटांना आंतरराष्ट्रीय स्तरावर अधिक व्यापक संधी उपलब्ध होण्याची अपेक्षा व्यक्त केली जात आहे.
