मुंबई : मुंबईतलं सर्वात लोकप्रिय मंडळ अशी ख्याती असलेल्या लालबागचा राजा गणेश विसर्जनासाठी तब्बल ३५ तास लागले. यंदा पहिल्यांदाच लालबागचा राजा अनंत चतुर्दशीच्या दुसऱ्या दिवशी रात्री ८.३० ते ९ च्या आसपास विसर्जित झाला. लालबागचा राजाचं दर्शन घेण्यासाठी भाविकांची मोठ्या प्रमाणावर गर्दी झाली होती. पंढरीच्या वारीत जसे हौशे, नौशे आणि गवशे असतात तसाच प्रकार इथेही घडला. लालबागचा राजा गणपतीला निरोप देण्यासाठी आलेल्या भक्तांचे मोबाइल, सोन्याचे दागिने आदी सगळं चोरीला गेल्याच्या घटना आता समोर आल्या आहेत.
पोलिसांनी दिलेल्या माहितीनुसार लालबागचा राजा गणपतीचं दर्शन घेण्यासाठी गिरगाव चौपाटीवर आलेल्या गणेशभक्तांचे १०० हून अधिक फोन चोरीला गेले. काळाचौकी पोलीस ठाण्यात या प्रकरणी तक्रारी नोंदवण्यात आल्या. या प्रकरणात अद्याप चार आरोपींना अटक कऱण्यात आली आहे त्यांच्याकडून चार मोबाइल ताब्यात घेण्यात आले आहेत. तसंच सोनसाखळी चोरी झाल्याच्याही अनेक तक्रारी काळाचौकी पोलीस ठाण्यात नोंदवल्या गेल्या आहेत. या प्रकरणी पोलिसांनी १२ आरोपींना ताब्यात घेतलं आहे. तर दोन सोन्याच्या चेन यांच्याकडून ताब्यात घेतल्या आहेत. मुंबई पोलिसांच्या भोईवाडा पोलीस ठाण्यात संमतीशिवाय ड्रोन वापरल्या प्रकरणीही गुन्हे दाखल झाले आहेत.
