आता Swiggy Instamart वरून LPG सिलिंडरही मिळणार घरपोच; HPCL सोबत भागीदारी

नवी दिल्ली : क्विक-कॉमर्स क्षेत्रात आणखी एक महत्त्वाचे पाऊल टाकत Swiggy Instamart आणि हिंदुस्तान पेट्रोलियम कॉर्पोरेशन लिमिटेड (HPCL) यांनी भारतातील पहिली ऑन-डिमांड एलपीजी (LPG) गॅस सिलिंडर डिलिव्हरी सेवा सुरू केली आहे. या नव्या सुविधेची सुरुवात कर्नाटकची राजधानी बेंगळुरूमध्ये करण्यात आली असून, क्विक-कॉमर्स प्लॅटफॉर्मवरून एलपीजी सिलिंडर घरपोच उपलब्ध करून देणारी ही देशातील पहिली सेवा ठरली आहे. या उपक्रमांतर्गत ग्राहकांना Swiggy Instamart ॲपवर दोन प्रकारचे सिलिंडर उपलब्ध करून देण्यात आले आहेत. यामध्ये HPCL चा १० किलो क्षमतेचा ‘HP नव्या’ कॉम्पोझिट सिलिंडर आणि ५ किलो क्षमतेचा मेटल FTL सिलिंडर यांचा समावेश आहे. ‘HP नव्या’ हा फायबरपासून तयार करण्यात आलेला वजनाने हलका आणि गंजरोधक सिलिंडर असून त्याचे अर्धपारदर्शक कव्हर असल्यामुळे आत किती गॅस शिल्लक आहे, हे सहज पाहता येते. तर ५ किलोचा मेटल सिलिंडर लहान कुटुंबे, विद्यार्थी आणि नोकरदार वर्गासाठी उपयुक्त पर्याय म्हणून उपलब्ध करून देण्यात आला आहे. या सेवेचे आणखी एक वैशिष्ट्य म्हणजे सिलिंडर खरेदी करण्यासाठी ग्राहकांकडे आधीपासून घरगुती एलपीजी कनेक्शन असणे आवश्यक नाही. पहिल्यांदा ऑर्डर देणाऱ्या ग्राहकांना ॲपवरच ओळखपत्र पडताळणी करून नवीन सिलिंडर खरेदी करता येणार आहे. पहिल्या खरेदीनंतर पुढील रिफिल ऑर्डर करताना ग्राहकांनी रिकामा HPCL सिलिंडर डिलिव्हरीवेळी परत देणे आवश्यक असेल. सुरक्षिततेला सर्वोच्च प्राधान्य देत या सेवेसाठी विशेष व्यवस्था करण्यात आली आहे. सिलिंडरची डिलिव्हरी सामान्य Swiggy डिलिव्हरी भागीदारांकडून केली जाणार नसून, ती HPCL च्या अधिकृत वितरक नेटवर्कमधील प्रशिक्षित कर्मचाऱ्यांकडून सर्व शासकीय सुरक्षा नियमांचे पालन करून केली जाणार आहे. त्यामुळे ग्राहकांना जलद सेवेसोबतच सुरक्षित आणि विश्वासार्ह वितरणाचा लाभ मिळणार आहे. शहरांमध्ये वाढती मागणी, लहान कुटुंबांची गरज आणि जलद वितरण सेवांची लोकप्रियता लक्षात घेता हा उपक्रम एलपीजी वितरण व्यवस्थेत महत्त्वाचा बदल घडवून आणणारा ठरण्याची शक्यता आहे. बेंगळुरूमधील या पायलट उपक्रमाला चांगला प्रतिसाद मिळाल्यास भविष्यात देशातील इतर शहरांमध्येही ही सेवा टप्प्याटप्प्याने विस्तारली जाऊ शकते.

ऑर्डर कशी करावी?

1. मोबाईलमध्ये Swiggy ॲप ओपन करून Instamart सेक्शनमध्ये जा.
2. सर्च बारमध्ये “LPG gas cylinder” टाईप करा.
3. उपलब्ध पर्यायांपैकी तुमच्या गरजेनुसार ५ किलो किंवा १० किलो (HP Navya) सिलिंडर निवडून कार्टमध्ये जोडा.
4. पहिल्या ऑर्डरसाठी आयडी प्रूफ अपलोड करा, पेमेंट पूर्ण करा आणि काही मिनिटांत गॅस सिलिंडर तुमच्या दारात उपलब्ध होईल.