मुंबई : वाहनांवर उच्च सुरक्षा नोंदणी नंबरप्लेटसाठी (एचएसआरपी) बसविण्यासाठी यापुढे कोणतीही मुदतवाढ दिली जाणार नसल्याचे राज्याचे परिवहन मंत्री प्रताप सरनाईक यांनी स्पष्ट केले आहे. एचएसआरपी नंबरप्लेट नसलेल्या वाहनांवर १ जुलैपासून दंडात्मक कारवाई सुरू झाली असून ती पुढेही सुरू राहणार असल्याचे त्यांनी सांगितले. विधिमंडळ परिसरात प्रसारमाध्यमांशी संवाद साधताना त्यांनी सर्व वाहनधारकांना तातडीने उच्च सुरक्षा क्रमांकफलक बसवून घेण्याचे आवाहन केले. सरनाईक म्हणाले की, एचएसआरपी क्रमांकफलक बसविण्यासाठी राज्य सरकारने यापूर्वी तब्बल पाच वेळा मुदतवाढ दिली होती. डिसेंबर २०२४ मध्ये निविदा प्रक्रियेला गती देण्यात आली आणि त्यानंतर तीन कंपन्यांना हे काम देण्यात आले. राज्यातील २०१९ पूर्वी नोंदणी झालेल्या सुमारे दोन कोटी दहा लाख वाहनांसाठी एचएसआरपी क्रमांकफलक बंधनकारक करण्यात आला होता. या प्रक्रियेसाठी ३० जून ही अंतिम मुदत निश्चित करण्यात आली होती. मुदत संपल्यानंतर १ जुलैपासून नियमांचे पालन न करणाऱ्या वाहनांवर कारवाई सुरू करण्यात आली आहे. सुरक्षेच्या दृष्टीने हे क्रमांकफलक अत्यंत महत्त्वाचे असल्याने वाहनधारकांनी विलंब न करता ते बसवून घ्यावेत, असे आवाहन त्यांनी पुन्हा केले.
परिवहन मंत्र्यांनी स्पष्ट केले की, एचएसआरपी क्रमांकफलकासाठी यापुढे कोणतीही अतिरिक्त मुदत दिली जाणार नाही. राज्यात अद्याप सुमारे एक कोटी आठ लाख वाहनांवर हे क्रमांकफलक बसविण्यात आलेले नाहीत. ३० जूनपर्यंत उपलब्ध आकडेवारीनुसार केवळ ४९ टक्के वाहनधारकांनी एचएसआरपी क्रमांकफलक बसविले असून उर्वरित ५१ टक्के वाहनांवर अद्याप ते बसविण्यात आलेले नाहीत. त्यामुळे नियमांचे उल्लंघन करणाऱ्या वाहनांवर कारवाई सातत्याने सुरू राहील, असे त्यांनी स्पष्ट केले. या क्रमांकफलकासाठी आकारले जाणारे शुल्कही माफक असून निविदा प्रक्रिया पूर्णपणे पारदर्शक पद्धतीने राबविण्यात आल्याचे त्यांनी सांगितले. राज्याच्या सुरक्षेच्या दृष्टीने उच्च सुरक्षा क्रमांकफलक अनिवार्य असून, दहशतवादी हल्ल्यांच्या पार्श्वभूमीवर केंद्र आणि राज्य शासनाने यास प्राधान्य दिले होते. वाहनांची ओळख अचूकपणे पटविणे, गुन्ह्यांचा तपास सुलभ करणे आणि सुरक्षाव्यवस्था अधिक सक्षम करणे या उद्देशाने ही व्यवस्था लागू करण्यात आली आहे. त्यामुळे वाहनधारकांनी दंडात्मक कारवाई टाळण्यासाठी तातडीने एचएसआरपी क्रमांकफलक बसवून घ्यावेत, असे आवाहन प्रताप सरनाईक यांनी केले.
