NITIN GADKARI | केंद्रीय रस्ते व महामार्ग मंत्री नितीन गडकरी यांच्या जीवन प्रवासावरील चित्रपट लवकरचं प्रेक्षकांच्या भेटीला येत आहे. या चित्रपटाचे टिझर पोस्टर सोशल मीडियावर प्रदर्शित करण्यात आले आहे. या चित्रपटाची कथा, पटकथा आणि दिग्दर्शन अनुराग राजन भुसारी यांनी केले असून, अक्षय देशमुख चित्रपटाचे निर्माते आहेत. चित्रपटामध्ये नितीन गडकरी यांची भूमिका कोण साकारणार आहे? या प्रमुख भूमिकेत कुणाला पाहयला मिळेल यासाठी प्रेक्षकांची उत्सुकता शिगेला पोहोचली आहे. पोस्टरमध्ये दिलेल्या माहितीनुसार, 27 ऑक्टोबर रोजी हा चित्रपट प्रदर्शित होणार आहे.
चित्रपटाबद्दल सांगताना दिग्दर्शक अनुराग भुसारी म्हणाले, ” नितीन गडकरी यांची राजकारणातील कारकिर्द निश्चितच उल्लेखनीय आहे. अभ्यासू, प्रभावी वक्ता, कणखर, निरपेक्ष विचार करणारा नेता, रस्ता सुधारणा प्रवर्तक. त्यांच्या व्यक्तिमत्वाच्या या विविध बाजू जनतेला माहितच आहेत. समाज कल्याणाचा ध्यास असणाऱ्या या नेत्याचा राजकारणातील प्रवास तसा अनेकांना माहित आहे. मात्र त्यांचे वैयक्तिक आयुष्य व तरुण काळ तितकाच रंजक आहे. अशा या नेत्याचा जीवनप्रवास प्रेक्षकांसमोर मांडण्याचा प्रयत्न या चित्रपटातून करण्यात आला आहे.”
