मुंबई : गेटवे ऑफ इंडिया ते जवाहरलाल नेहरू बंदर प्राधिकरण (जेएनपीए) असा प्रवास एक तासांऐवजी केवळ ४० मिनिटांत पूर्ण करण्याचे प्रवाशांचे, जेएनपीए कर्मचार्यांचे स्वप्न आता लवकरच पूर्ण होणार आहे. गेटवे ते जेएनपीए जलमार्गावर ई वॉटर टॅक्सी सेवा सुरु करण्याचा निर्णय जेएनपीएने घेतला आहे. त्यानुसार दोन ई वॉटर टॅक्सी तयार झाल्या असून २२ सप्टेंबरपासून या ई वॉटर टॅक्सी गेटवे ते जेएनपीएदरम्यान धावणार आहेत, सेवेत दाखल होणार आहे.
गेटवे ते जेएनपीएदरम्यान जलप्रवासासाठी सध्या लाकडी बोटी आहेत. त्यातून प्रवास करण्यासाठी एक तास किंवा कधी त्याहीपेक्षा अधिक वेळ लागतो. त्यात सर्व लाकडी बोटी आता जुन्या झाल्या आहेत. त्यामुळे जेएनपीएने या मार्गावर विद्युत वॉटर टॅक्सी सुरु करण्याचा निर्णय घेण्यात आला होता. अतिजलद आणि सुरक्षित प्रवास हा उद्देश या मागे होताच, पण त्याचवेळी प्रदूषण कमी करणारी सेवा या जलमार्गावर सुरु करण्याचेही उद्दिष्ट जेएनपीएचे होते. त्यामुळे या मार्गावर ई वॉटर टॅक्सी सुरु करण्याचा निर्णय घेण्यात आला.
आधी या टॅक्सी परदेशात तयार करण्यात येणार होत्या. पण नंतर त्या भारतातच तयार करण्याचा निर्णय घेत माझगाव डॉक शिपबिल्डर्स लिमिटेडला हे काम देण्यात आले. या वॉटर टॅक्सी तयार होऊन यापूर्वीच सेवेत दाखल होणे अपेक्षित होते. मात्र काही तांत्रिक कारणाने ई वॉटर टॅक्सी तयार होण्यास विलंब झाला. आता मात्र दोन ई वॉटर टॅक्सी सेवेत दाखल होण्याची प्रतीक्षा लवकरच संपणार आहे. २२ सप्टेंबरपासून ई वॉटर टॅक्सी सुरु होणार असल्याची माहिती जेएनपीएचे अध्यक्ष उन्मेष वाघ यांनी दिली. भारतात बांधणी झालेल्या या दोन वॉटर टॅक्सीपैकी एक वॉटर ट्रक्सी सौर ऊर्जेवर चालणारी तर दुसरी पूर्णत विद्युत वॉटर टॅक्सी आहे. या बोटींची प्रवासी क्षमता २० प्रवासी अशी असून गेटवे ते जेएनपीए प्रवासासाठी १०० रुपये असे तिकिट दर असण्याची शक्यता आहे. या ई वॉटर टॅक्सीच्या संचलन आणि देखभालीची जबाबदारी भारत फ्रेट ग्रुप यांच्याकडे देण्यात आली आहे.
