पुणे : पुण्यातील मेट्रो नेटवर्क एका नव्या अपडेटसाठी सज्ज झाले आहे. पुणे मेट्रो लोहेगाव येथील पुणे विमानतळ आणि वेगाने विकसित होत असलेल्या कोंढवा-येवलेवाडी/ उंड्री परिसराला नवीन मेट्रो कॉरिडोरने जोडण्याची योजना आखत आहे. या विस्तारासाठी महा-मेट्रो प्रशासनाने कामाला सुरुवात केल्याची माहिती समोर आली आहे.
पुणे मेट्रोचा विस्तार लोहेगाव, कोंढवा-येवलेवाडी/ उंड्री या परिसरापर्यंत करण्यासाठी महा-मेट्रोने तपशीलवार प्रकल्प अहवाल (डीपीआर) तयार करण्यासाठी निविदा मागवण्यात आल्या आहेत. पहिल्या फेरीनंतर, आरवी इंजिनिअरिंग कन्सल्टंट्स लिमिटेड आणि आरआयटीईएस लिमिटेड या दोन कंपन्यांनी तांत्रिक टप्प्याला मंजुरी दिली आहे. येत्या काही दिवसांत प्रकल्पाच्या आर्थिक निविदा उघडल्या जातील आणि सर्वात कमी रक्कम भरणाऱ्या कंपनीला डीपीआर तयार करण्याचे काम मिळेल.मेट्रो विस्ताराचा प्रकल्प अहवाल नवीन मार्गिकेचा अचूक मार्ग आणि व्यवहार्यता निश्चित करेल असे म्हटले जात आहे. सध्या शेअर करण्यात आलेले नकाशे हे कच्च्या स्वरूपातील आहेत. सविस्तर अभ्यासानंतर अंतिम निर्णय घेण्यात येईल.
