ठाणे : ठाणे परिवहन उपक्रमाच्या टीएमटी गाड्यांमध्ये ज्येष्ठ नागरिकांना मोफत प्रवास दिला जातो. परंतू, या योजनेतील गैरप्रकार टाळण्यासाठी आता ‘डिजिटल बस पास’ योजना राबवण्यात येत आहे. केवळ ठाणे महापालिका क्षेत्रातील ज्येष्ठ नागरिकांनाच या सुविधेचा लाभ मिळावा, यासाठी हा निर्णय घेण्यात आला आहे. यासाठी अर्ज प्रक्रिया सुरू झाल्याने टीएमटी आगारातील कार्यालयांमध्ये ज्येष्ठ नागरिकांची मोठी गर्दी होत आहे. ज्येष्ठ नागरिकांना एक ते दोन तास रांगेत उभे राहावे लागत असल्यामुळे त्यांच्यामधून संताप व्यक्त केला जात आहे.
ठाणे परिवहन सेवेच्या टीएमटी बस गाड्यांमधून ज्येष्ठ नागरिकांना गेले काही वर्षांपासून मोफत प्रवास सेवा दिली जात आहे. परंतू, ही सेवा केवळ ठाणे महापालिका क्षेत्रातील ज्येष्ठ नागरिकांसाठी असतानाही, यासेवेचा इतर शहरातील ज्येष्ठ नागरिक देखील लाभ घेत होते. तर, वाहकांकडूनही चुकीचे तिकीट दिले जात होते. हे प्रकार टाळण्यासाठी ठाणे परिवहन विभागाने ज्येष्ठ नागरिकांना डिजिटल बस पास योजना सुरू करण्याचा निर्णय घेतला आहे. ज्याच्याकडे डिजीटल पास त्या ज्येष्ठ नागरिकांनाच मोफत प्रवास करता येणार आहे. यासाठी ठाणे शहरातील मुख्य टीएमटी आगारात डिजीटल पासचा अर्ज उपलब्ध करण्यात आला आहे. हे अर्ज घेण्यासाठी ज्येष्ठ नागरिकांची टीएमटी आगारावर मोठी गर्दी होत आहे. त्यानंतर, हे अर्ज घेऊन सॅटीस पुलावरील टीएमटी कार्यालयात जमा करायचा आहे. त्यासाठी सॅटीस पुलावर सकाळी ८ वाजल्यापासून ज्येष्ठ नागरिकांची गर्दी होत आहे. विशेष म्हणजे, या योजनेबाबत ठाणे महापालिकेच्या परिवहन विभागाकडून अद्याप पूर्णपणे जनजागृती झाली नसल्यामुळे अनेक ज्येष्ठांमध्ये याविषयी गोंधळ उडत आहे.
