मुंबई : बेस्टच्या ताफ्यातील भाडेतत्त्वावरील विद्युत बसांच्या वाढत्या अपघातांच्या पार्श्वभूमीवर प्रवाशांच्या सुरक्षेसाठी बेस्ट प्रशासनाने महत्त्वाचा निर्णय घेतला आहे. ई-बस चालकांसाठी आता चार आठवड्यांचे विशेष प्रशिक्षण बंधनकारक करण्यात आले असून यापूर्वी हे प्रशिक्षण केवळ एका आठवड्यापुरते मर्यादित होते. गेल्या काही वर्षांत आर्थिक बचत आणि तोटा कमी करण्याच्या उद्देशाने बेस्टने मोठ्या प्रमाणात भाडेतत्त्वावरील बस ताफ्यात समाविष्ट केल्या आहेत. सध्या बेस्टच्या ताफ्यात एकूण २,७९२ बस असून त्यापैकी केवळ २४९ बस स्वमालकीच्या आहेत, तर २,५४४ बस भाडेतत्त्वावरील आहेत. या भाडेतत्त्वावरील बसांमध्ये १,२२५ सीएनजी आणि १,३१९ विद्युत बसांचा समावेश आहे. अलिकडच्या काळात ई-बसना आग लागणे आणि अपघात घडण्याच्या काही घटनांमुळे सुरक्षेच्या मुद्द्यावर प्रश्नचिन्ह निर्माण झाले होते. विविध तपासण्यांमध्ये १० ते ११ बसांमध्ये तांत्रिक दोष आढळल्याने त्या तातडीने सेवेतून बाजूला काढण्यात आल्या होत्या.
बेस्टच्या वरिष्ठ अधिकाऱ्यांच्या माहितीनुसार, नव्या प्रशिक्षणामध्ये तांत्रिक बाबी, सुरक्षित वाहनचालक पद्धती, आपत्कालीन परिस्थितीचे व्यवस्थापन, शिस्तबद्ध संचालन तसेच ई-बसच्या कार्यप्रणालीची सखोल माहिती दिली जाणार आहे. याशिवाय बसची देखभाल आणि तपासणी प्रक्रियाही अधिक कठोर करण्यात आली आहे. मे महिन्यात कुर्ला, प्रतीक्षा नगर आणि सांताक्रूझ आगार येथे बसला आग लागण्याच्या चार घटना घडल्या होत्या. तसेच काही आगारांतील देखभाल व्यवस्थेतील त्रुटी आणि चालकांच्या वर्तनाबाबतही प्रश्न उपस्थित झाले होते. यामुळे बेस्ट समिती सदस्यांनी देखभालीवर अधिक प्रभावी नियंत्रण ठेवण्याबरोबरच निष्काळजीपणा करणाऱ्या चालकांवर शिस्तभंगाची कारवाई करण्याची मागणी केली आहे. विशेषतः भांडुप आणि कुर्ला येथे बस मागे जाण्याच्या घटनांनंतर प्रशिक्षण अधिक कठोर करण्यात आले आहे. उतार किंवा अरुंद रस्त्यांवर बस सुरक्षितपणे कशी हाताळावी, हँडब्रेकचा योग्य वापर कसा करावा आणि ई-बसमधील प्रगत ब्रेकिंग सिस्टीमची माहिती यावर विशेष भर दिला जाणार आहे. या निर्णयामुळे मुंबईतील बससेवा अधिक सुरक्षित, विश्वासार्ह आणि प्रवाशांसाठी अधिक संरक्षित होईल, असा विश्वास बेस्ट प्रशासनाने व्यक्त केला आहे.
