मुंबई : एल्फिस्टन वासियांसाठी मोठी बातमी समोर आली आहे. एल्फिन्स्टन येथे सध्याचा पूल काढून वरळी- शिवडी कनेक्टरसाठी डबलडेकर पूल उभारला जाणार आहे. या पुलामुळे बाधित होणाऱ्या दोन इमारतींमधील रहिवाशांना लवकरच नव्या घराच्या चाव्या मिळणार असल्याचं अधिकाऱ्यांनी म्हटलं आहे.
म्हाडा येत्या दोन दिवसांमध्ये मुंबई महानगर प्रदेश विकास प्राधिकरणाला (एमएमआरडीए) घराचा ताबा देणार असून त्यादृष्टीने युद्धपातळीवर तयारी सुरू आहे. त्यानंतर एमएमआरडीएकडून रहिवाशांना घरांचे वाटप करण्यात येणार आहे. एल्फिन्स्टन पुलाच्या कामामुळे येथील हाजी नुरानी आणि लक्ष्मी निवास या दोन इमारती बाधित होणार आहेत. लक्ष्मी निवास या इमारतीत ६०, तर हाजी नुरानी या इमारतीत एमएमआरडीएने रहिवाशांसाठी सुरुवातीला ८३ घरांची निवड केली होती. आता मात्र एमएमआरडीएने म्हाडाकडे केवळ ७८ घरांची मागणी केली आहे. रेडिरेकनरच्या ११० टक्के दर याप्रमाणे ७८ घरांपोटी ९० कोटी रुपये नववर्षाच्या सुरुवातीला एमएमआरडीएने म्हाडाच्या तिजोरीत जमा केले आहेत. पुढील दोन दिवसांत ही घरे एमएमआरडीएला सुपूर्द करण्यात येणार आहेत. या घरांच्या दुरुस्तीवर खर्च केलेले दीड कोटी रुपये मिळावेत, अशी मागणीही म्हाडाकडून करण्यात आली आहे. आमचे याच परिसरात पुनर्वसन करा, अशी रहिवाशांची मागणी होती. मात्र संबंधित रहिवाशांना दादर, माहीम, माटुंगा, वडाळा, प्रभादेवी, लोअर परळ या भागातील म्हाडाची घरे दिली जाणार आहेत.
