मुंबई : पॉलिटिशियन बाबा सिद्दीकी यांच्या मृत्युनंतर बॉलीवूड सेलेब्सना जीवे मारण्याच्या धमक्यांचे प्रमाण वाढले आहे. आधी ही धमकी सलमान खानला मिळाली होती. आता बॉलीवूडचे किंग खान शाहरुख खानलाही जीवे मारण्याची धमकी मिळाली आहे. शाहरुख खानच्या टीमला धमकीचा फोन आल्यानंतर पोलिसांत तक्रार दाखल करण्यात आली आहे. मुंबई पोलीस याची चौकशी करत आहेत.
मीडिया रिपोर्ट्सनुसार, धमकी देणाऱ्याने म्हटले आहे की, ‘बँड स्टँड वाले शाहरुख खानला मारून टाकेन. जर मला ५० लाख रुपये दिले नाहीत तर मी त्याला जीवे मारून टाकेन.’ जेव्हा त्याला विचारण्यात आले की तो कोण बोलत आहे, तेव्हा त्याने उत्तर दिले, ‘माझे नाव हिंदुस्तानी आहे.’
हा प्रकार ५ नोव्हेंबरचा असल्याचे सांगितले जात आहे. पोलिसांनी हा गुन्हा बीएनएसच्या कलम ३०८(४) आणि ३५१(३)(४) अंतर्गत दाखल केला आहे. अधिकारी कॉल करणाऱ्याचा शोध घेत आहेत आणि अभिनेत्यांच्या सुरक्षेची खात्री करत आहेत. मुंबई पोलिसांच्या टीमने शाहरुख खानला धमकी देणारा फोन रायपूर, छत्तीसगड येथून आल्याचे शोधून काढले आहे. नंबर ट्रेस झाल्यानंतर मुंबई पोलिसांची टीम रायपूरला पोहोचली आहे.
शाहरुख खानला धमकी मिळाल्यानंतर त्यांच्या घराबाहेर सुरक्षा वाढवण्यात आली आहे. शाहरुख खानने २ नोव्हेंबर रोजी आपला ५९ वा वाढदिवस साजरा केला. या भव्य पार्टीत अनेक सेलेब्स सहभागी झाले होते. मात्र, सुरक्षेच्या कारणास्तव शाहरुख खान यावेळी आपल्या चाहत्यांना भेटण्यासाठी मन्नतच्या बाल्कनीत आले नव्हते.
