पुणे : टोळी युद्धातून माजी नगरसेवक वनराज आंदेकर यांच्या खूनाची घटना घडल्यापासून शहरातील खूनाचे सुरूच राहिले आहे. हडपसरनंतर आता स्वारगेटमधील डायसप्लॉट परिसरात मोक्कातील गुन्हेगाराने जामीनावर बाहेर आल्यानंतर एका तरुणाचा जुन्या वादातून खून केल्याचा प्रकार समोर आला आहे. त्याच्यावर चाकूने वार करून निर्घुन खून केला असून, या खुनाने शहरात चांगलीच खळबळ उडाली आहे. सुनील सरोदे ‘वय २०, रा. डायस प्लॉट, गुलटेकडी’ असे खून झालेल्या तरुणाचे नाव आहे. याप्रकरणी स्वारगेट पोलिसांनी रोहन कांबळे, साहिल कांबळे, शिवशरण धेंडे यांच्यासह पाच जणांना अटक केली आहे. याप्रकरणी खूनाचा गुन्हा नोंद केला आहे. पोलिसांच्या माहितीनुसार, साहिल कांबळे याच्यावर महाराष्ट्र संघटित गु्न्हेगारी नियंत्रण कायद्यान्वये ‘मोक्का’ कारवाई केली होती. मोक्का कारवाई केल्यानंतर साहिल नुकताच जामीन मिळवून बाहेर आला आहे. सरोदे हा डायस प्लॉट येथे राहायला आहे. त्याचा भाऊ आणि आरोपींची भांडणे झाली होती. पोलीसांकडून साहिलविरुद्ध प्रतिबंधात्मक कारवाई करण्यात येणार होती. कारवाईपूर्वी त्याने डायस प्लॉट परिसरात मध्यरात्री दहशत माजविली.
आरोपी रोहन व साहिल हे साथीदारांसह सुनिल सरोदे याच्या भावाला मारण्यासाठी डायस प्लॉट परिसरात आले होते. सरोदेच्या भावाला ते मारत होते. त्यावेळी सरोदेने भावाला वाचविण्याचा प्रयत्न केला. सरोदेच्या मानेवर चाकूने वार करण्यात आला. मानेची नस तुटल्याने मोठ्या प्रमाणावर रक्तस्त्राव होऊन त्याचा मृत्यू झाला. या घटनेची माहिती मिळाल्यावर पसार झालेल्या आरोपींना पोलिसांनी अटक केली, अशी माहिती पोलीस उपायुक्त स्मार्तना पाटील यांनी दिली. पुण्यात रविवारी राष्ट्रवादी काँग्रेसचे माजी नगरसेवक वनराज आंदेकर यांचा निर्गुण खून करण्यात आला होता. सख्ख्या बहिणींनीच हा खून केल्याचे निष्पन्न देखील झाले होते. यातील काही आरोपींना अटक देखील करण्यात आली होती. मात्र या घटनेमध्ये आता आणखीन माहिती समोर आली असून ताम्हिणी घाटामध्ये लपून बसलेल्या १३ आरोपींना पोलिसांनी अटक केली आहे. पोलिसांनी सोमवारी या खूनप्रकरणी प्रकाश कोमकर, सोमनाथ गायकवाड आणि संजीवनी जयंत कोमकर यांना अटक केली होती. आता यामध्ये आणखी १३ जणांना ताब्यात घेण्यात आला आहे. ताब्यात घेण्यात आलेल्यांपैकी काही जण अल्पवयीन असल्याचे पोलिसांनी सांगितले.
