डोंबिवली : डोंबिवलीत सावळाराम महाराज क्रीडासंकुलात सुरू असलेल्या आगरी महोत्सवाला नागरिकांचा उत्सफूर्त प्रतिसाद मिळत आहे. ठाणे, रायगड, पालघर, मुंबई परिसरातील आगरी, कोळी समाजासह इतर नागरिक अधिक संख्येने या महोत्सवाला भेट देत आहेत. आगरी समाज संस्कृतीचे दर्शन या महोत्सवाच्या माध्यमातून नागरिकांना घडत आहे. मागील एकविस वर्षापासून आगरी महोत्सव भरत आहे.
विविध प्रकारचे मनोरंजन, सांस्कृतिक, साहित्यिक कार्यक्रमांची या महोत्सवात पर्वणी आहे. या महोत्सवात विविध प्रकारचे सुमारे १५० मंच आहेत. राज्याच्या विविध भागातील गृहपयोगी घरगुती वस्तू तयार करणाऱ्या महिलांचे गट, बचत गट या महोत्सवात सहभागी आहेत. एकाच ठिकाणी विविध प्रकारच्या वस्तू खरेदी करण्याची संधी यानिमित्ताने आगरी युथ फोरमने नागरिकांना उपलब्ध करून दिली आहे. संध्याकाळी साडे तीन वाजल्यापासून नागरिक आगरी महोत्सवाच्या दिशेने निघतात. संध्याकाळी सहा वाजल्यानंतर सावळाराम महाराज क्रीडासंकुल परिसर महोत्सवाला भेट देण्यास आलेल्या नागरिक, वाहनांनी गजबजून गेलेला असतो.
