पुणे : लोणावळा ग्रामीण पोलीस ठाण्याच्या हद्दीत गांजा विक्रीच्या उद्देशाने जवळ बाळगणाऱ्या एका तरुणाला स्थानिक गुन्हे शाखेच्या पथकाने अटक केली. या कारवाईत ८ किलो ५०० ग्रॅम गांजा आणि एक कार, असा एकूण ७ लाख २५ हजार रुपयांचा मुद्देमाल जप्त करण्यात आला. हा गांजा विक्रीसाठी आणला होता की अन्य कोणत्या उद्देशाने जवळ बाळगला होता, तसेच या प्रकरणामागे आणखी कोणाचे जाळे आहे का, याचा तपास पोलिसांकडून सुरू आहे.
पोलिसांनी दिलेल्या माहितीनुसार, ९ ऑगस्ट २०२६ रोजी स्थानिक गुन्हे शाखेचे पथक लोणावळा ग्रामीण पोलीस ठाण्याच्या हद्दीत पेट्रोलिंग करीत होते. त्यावेळी गोपनीय बातमीदारामार्फत पोलिसांना माहिती मिळाली की, शुभम रमाकांत शर्मा (वय २३, रा. श्रमदान नगर, कुसगाव बुद्रुक, ता. मावळ, जि. पुणे) हा कुसगाव बुद्रुक येथील आयआरबी कार्यालय परिसरात कारमधून गांजा विक्री करीत आहे. माहितीची खातरजमा केल्यानंतर स्थानिक गुन्हे शाखेच्या पथकाने संबंधित परिसरात सापळा रचला. संशयित व्यक्तीला शिताफीने ताब्यात घेतल्यानंतर त्याची आणि त्याच्या ताब्यातील कार ची झडती घेण्यात आली. यावेळी कारमध्ये गांजा आढळून आला. पोलिसांनी ४ लाख २५ हजार रुपये किमतीचा ८ किलो ५०० ग्रॅम गांजा तसेच ३ लाख रुपये किमतीची हुंडाई आय-१० कार (क्र. एमएच १४ बीके ७२३५) जप्त केली. या प्रकरणी आरोपीविरुद्ध अंमली पदार्थ आणि मन:प्रभावी पदार्थ अधिनियम (NDPS Act) अंतर्गत कायदेशीर कारवाई करण्यात आली आहे. ही कारवाई पोलीस अधीक्षक संदीप सिंह गिल्ल, अपर पोलीस अधीक्षक शुभम कुमार, उपविभागीय पोलीस अधिकारी गजानन टोम्पे, स्थानिक गुन्हे शाखेचे पोलीस निरीक्षक प्रमोद क्षीरसागर आणि लोणावळा ग्रामीण पोलीस ठाण्याचे पोलीस निरीक्षक दिनेश तायडे यांच्या मार्गदर्शनाखाली करण्यात आली. या प्रकरणातील गांजाचा स्रोत आणि त्यामागील संभाव्य नेटवर्कचा तपास सुरू आहे.
