पेण : मुंबई गोवा महामार्गावर गॅस सिलेंडर वाहून नेणाऱ्या वाहनाला आग लागली आहे. त्यामुळे महामार्गावरील दोन्ही बाजूची वाहतूक रोखून ठेवण्यात आली आहे. महामार्गावर पेण तालुक्यातील वाशी- उंबर्डे फाटा येथे ही घटना घडली आहे. गॅस सिलेंडर वाहून नेणाऱ्या एका वाहनाला आग लागली. या घटनेत कुठलीही जिवित हानी झाली नसली तरी अपघातग्रस्त वाहन जळून खाक झाले आहे. घटनेची माहिती मिळताच पेण नगरपालिका आणि जेएसडब्ल्यू कंपनीचे अग्निशमन दल घटनास्थळी दाखल झाले त्यांनी आगीवर नियंत्रण मिळवले.
अपघातामुळे महामार्गावरील दोन्ही बाजूची वाहतूक रोखून धरण्यात आली आहे. गॅस सिलेंडरचा फोटो होण्याची शक्यता असल्याने ही खबरदारी घेण्यात आली आहे. त्यामुळे महामार्गावर दोन्ही बाजूला वाहनांच्या रांगा लागल्या आहेत. पेण पोलीस घटनास्थळी दाखल झाले आहेत. आगीमुळे अपघातग्रस्त वाहनातील सात सिलेंडरचे स्फोट झाले.. सिलेंडर उडून आसपासच्या परिसरात पडले. त्यामुळे भयावह परिस्थिती निर्माण झाली होती. मात्र अग्निशमन दलाने तातडीने आगीवर नियंत्रण मिळवले. मात्र तोवर हे वाहन जळून खाक झाले होते. बचाव पथकांकडून सध्या कुलिंग प्रोसेस सुरू करण्यात आली आहे.
